ՀՀԿ փոխնախագահ Ռազմիկ Զոհրաբյանը կարծում է, որ հայ-թուրքական արձանագրությունները թուրքական խորհրդարանում կվավերացվեն մինչև ընթացիկ տարեվերջ կամ մյուս տարվա գարնան սկիզբը:
«Հայաստանում արձանագրությունների վավերացումը տեղի կունենա թուրքական խորհրդարանի կողմից դրանց հաստատումից հետո կամ Թուրքիայում վավերացման հետ միաժամանակ»,- ասաց Զոհրաբյանը չորեքշաբթի մամուլի ասուլիսի ժամանակ:
Նրա խոսքերով՝ հասարակությունն ու Հայաստանի ընդդիմադիր ուժերը պետք է վստահ լինեն, որ երկկողմ հարաբերությունները, թեկուզ որոշ վերապահումներով, բայց անհրաժեշտ են երկու պետություններին: Զոհրաբյանն ընդգծեց, որ հայ-թուրքական սահմանի բացումն ու դիվանագիտական հարաբերությունների հաստատումը հեռանկարում բարենպաստ բնույթ են կրում Հայաստանի համար:
Ընդ որում նա հիշեցրեց, որ մոտ ժամանակներս հայկական կողմը արձանագրությունները կուղարկի Սահմանադրական դատարան դննարկման, որից հետո՝ ԱԺ:
Զոհրաբյանը նշեց, որ որևէ խնդիր չի տեսնում արձանագրությունների հաստատման հարցում այն առումով, որ խորհրդարաններից երկուսում էլ իշխող կուսակցությունները մեծամասնություն են կազմում: Սակայն նա անհրաժեշտ է համարում, որպեսզի արձանագրությունների բուն իմաստը հասցվի Հայաստանի և Թուրքիայի հասարակայնության լայն շրջանակներին:
Իշխող կուսակցության փոխնախագահը նաև վստահություն հայտնեց, որ Հայաստանի խորհրդարանում արաձանագրությունների հաստատման առնչությամբ փակ քվեարկություն չի լինի, քանի որ ժողովրդից տվյալ գործընթացը գաղտնի պահելը նշանակում է բամբասանքների համար լրացուցիչ առիթ տալ:
Ինչ վերաբերում է Թուրքիայի վրա գործադրվող միջազգային ճնշմանը, ապա Զոհրաբյանի խոսքերով՝ այդ հարցում կա երկու մոտեցում: Ըստ նրա՝ դրանցից առաջինը հայ-թուրքական հարաբերությունների, սահմանի բացման, քրդական հարցի լուծման հետ կապված քաղաքականությունում փոփոխություններ մտցնելու մասին ԵՄ առաջարկներն են:
«Թուրքիայի համար ավելի շահավետ է նորմալ հարաբերություններ հաստատել հարևանների հետ, ապահովել մարդու իրավունքների պաշտպանությունը: ԵՄ-ն երբեք թույլ չի տա, որ իրեն անդամակցի մի պետություն, որը չուզենա ճանաչել Ցեղասպանությունը»,- պարզաբանեց Զոհրաբյանը:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Ստորագրումից հետո երկու ամսվա ընթացքում փաստաթղթերը պետք է ներկայացվեն խորհրդարաններին վավերացման համար:
Թուրքական մեջլիսը հոկտեմբերի 21-ին կսկսի քննարկել ստորագրված փաստաթղթերը, երբ պատգամավորներին կդիմի ԱԳՆ ղեկավար Ահմեդ Դավութօղլուն:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ -0-
