ՀՀ ԿԸՀ-ն իշխող կուսակցությունից նոր պատգամավոր է գրանցել

ԵՐԵՎԱՆ, 20 հոկտեմբերի. /Նովոստի-Արմենիա/. ՀՀ Կենտրոնական ընտրական հանձնաժողովը երեքշաբթի նիստի ժամանակ Արտակ Զաքարյանին գրանցել է որպես Ազգային ժողովի նոր պատգամավոր ՀՀ իշխող Հանրապետական կուսակցության կուսակցական ցուցակով:

Զաքարյանը պատգամավոր է գրանցվել հոկտեմբերի 8-ին ավիավթարում զոհված Մելիք Գասպարյանի փոխարեն:

Արտակ Զաքարյանը ծնվել է 1974 թ.-ի նոյեմբերի 1-ին: 1996 թ.-ին ավարտել է ԵՊՀ մաթեմատիկական կիբեռնետիկայի և հետազոտությունների ավտոմատացման ֆակուլտետը: 1996-1998 թթ.-ին ծառայել է ազգային բանակում, եղել է հրաձգային գումարտակի փոխհրամանատար:

1998-2000 թթ.-ին ավարտել է Հայաստանի պետական կառավարման դպրոցը՝ ստանալով պետծառայողի որակավորում:

1999-2001 թթ.-ին զբաղեցրել է ՀՀ կառավարությանն առընթեր տարածքային ինտեգրացիայի վարչությունում կրթամշակութային բաժնի պետի պաշտոնը: 

2001 թ.-ից աշխատել է «Պետական գնումների գործակալություն» ՊՈԿԿ-ում: 2002 թ.-ից ՀՀ Հանրապետական կուսակցության անդամ է, 2003-2005 թթ.-ին ՀՀԿ հասարակական-քաղաքական հետազոտությունների կենտրոնի պատասխանատու: 2005-2006 թթ.-ին ՀՀԿ հասարակայնության հետ կապերի պատասխանատուն է եղել:

2005 թ.-ի դեկտեմբերի 17-ին ընտրվել է ՀՀԿ խորհրդի անդամ: Ամուսնացած է, ունի երկու երեխա: -0-