Հայաստանն ու Ֆրանսիան նոր շրջանակային համաձայնագիր կստորագրեն
Հոկտեմբերի 18-ին, Փարիզի Գավո սրահում Կոմիտասի ծննդյան 140-ամյակին նվիրված մեծ համերգից առաջ, Հայաստանի մշակույթի նախարար Հասմիկ Պողոսյանը հանդիպում ունեցավ Ֆրանսիայի մշակույթի եւ հաղորդակցության նախարար Ֆրեդերիկ Միտերանի հետ, տեղեկացնում է ՀՀ ԱԳՆ մամուլի ծառայությունը։
Հանդիպման ընթացքում նախարարներն անդրադարձան, 1995թ. համապատասխան պայմանագրի ստորագրումից ի վեր, հայ-ֆրանսիական մշակութային աշխույժ համագործակցությանը՝ բարձր գնահատելով Ֆրանսիայում Հայաստանի տարվա նշանակությունն այս հարցում։
Քննարկվեցին առաջիկա տարիներին այդ համագործակցությունն ընդլայնելու և խորացնելու հնարավորությունները։ Զրույցի ընթացքում պայմանավորվածություն ձեռք բերվեց ստորագրել նոր շրջանակային համաձայնագիր, որով կնախանշվեն փոխադարձ հետաքրքրություն ներկայացնող ոլորտները։
«Այս առումով, Հայաստանի համար մասնավոր հետաքրքրություն է ներկայացնում համատեղ կինոարտադրությունը, որի ուղղությամբ կատարվում են իրավական բազայի ստեղծման աշխատանքներ»,- ասված է հաղորդագրության մեջ։
Նախարար Պողոսյանը Ֆրանսիայի մշակույթի նախարարին հրավիրեց Հայաստան, որը սիրով ընդունեց հրավերը:
Տեղեկացնելով, որ 2012թ. Հայաստանը նշելու է իր տպագիր գրքի 500-ամյակը՝ ՀՀ մշակույթի նախարարը խնդրեց Ֆրանսիայի աջակցությունը ՅՈՒՆԵՍԿՕ-ում Երևանը գրքի միջազգային մայրաքաղաք ճանաչելու հարցում։
Համատեղ կինոարտադրության և կինոյի բնագավառում համագործակցության հարցեր քննարկվեցին նաև հոկտեմբերի 19-ին Ֆրանսիայի կինոգործիչների միության նախագահ Ալեն Թերզյանի եւ Ֆրանսիայի մշակույթի նախարարի կինոյի հարցով խորհրդական Ֆրանսուա Հյուրարի հետ հանդիպման ընթացքում։
Փարիզում գտնվելու ընթացքում ՀՀ մշակույթի նախարարն այցելեց Ֆրանսիայի Հայկական թանգարան և Փարիզի Նուբարյան գրադարան։ -0-
