Հնդկաստանը սատարում է հայ-թուրքական հարաբերությունների հաստատման գործընթացին. դեսպան

Հնդկաստանը սատարում է հայ-թուրքական հարաբերությունների հաստատման գործընթացին, երկուշաբթի ասաց Հայաստանում Հնդկաստանի նորանշանակ դեսպան Աչալ Կումար Մալհոթրային` հավատարմագրերի պատճենը հանձնելով Հայաստանի արտգործնախարար Էդվարդ Նալբանդյանին:

Ինչպես «Նովոստի-Արմենիա» գործակալությանը հայտնեցին ՀՀ ԱԳՆ մամուլի ծառայությունից, հանդիպման ընթացքում զրուցակիցներն առանձին անդրադարձան Հայաստանի և Թուրքիայի միջև հարաբերությունների նորմալացման գործընթացին:

Խոսելով հայ-հնդկական երկկողմ համագործակցության մասին՝ Նալբանդայանն ասաց, որ Հայաստանը ցանկանում է առավել զարգացնել հայ-հնդկական բարեկամական, գործընկերային հարաբերությունները, և հույս հայտնեց, որ դեսպան Մալհոթրան կարևոր ներդրում կունենա երկու երկրների համագործակցության հետագա ընդլայնման և խորացման գործում:

Զրուցակիցները քննարկեցին երկկողմ քաղաքական երկխոսության ակտիվացմանը, առևտրատնտեսական հարաբերությունների խթանմանը, իրավապայմանագրային դաշտի ընդլայնմանն ու միջազգային կազմակերպություններում համագործակցության խորացմանը վերաբերող հարցեր:

Հյուրի խնդրանքով՝ նախարար Նալբանդյանը ներկայացրեց նաև արցախյան հիմնախնդրի բանակցային գործընթացի վերջին զարգացումները:

Աչալ Կումար Մալհոթրան ծնվել է 1952թ.: Ավարտել է Ջավահարլալ Ներուի անվան համալսարանի ռուսաց լեզվի և գրականության բաժինը, այնուհետև` Պոնդիչերիի համալսարանը` զբոսաշրջության կառավարում մասնագիտւթյամբ: 

1984-2000թթ. աշխատել է Ռուսաստանում, Գերմանիայում, Բրունեյ Դարուսսալամում Հնդկաստանի դեսպանություններում:

2000-2004թթ. եղել է Շրի Լանկայում բարձրագույն հանձնակատարի օգնական, այնուհետև նշանակվել է  Ավստրիայում  Հնդկաստանի  դեսպանության դեսպանորդ, նաև` ՄԱԿ-ի գրասենյակում և այլ միջազգային կազմակերպություններում Հնդկաստանի մշտական ներկայացուցչի տեղակալ:

Ամուսնացած է, ունի մեկ զավակ:-0-