Լրացուցիչ կրթություն ստանալուն նվիրված «Մեծահասակների կրթության շաբաթ» ծրագիրը երկուշաբթի մեկնարկեց Երևանում։
Ինչպես հայտարարեց կրթության և գիտության նախարար Արմեն Աշոտյանը, ակնախ կարգավիճակից, սեռից և բազային կրթությունից` յուրաքանչյուր մարդ, առաջին հերթին, ավագ սերնդի ներկայացուցիչ, իրավունք ունի ցանկացած տարիքում ստանալ լրացուցիչ կրթություն։
«Այս շաբաթը պետության, միջազգային և տեղեկան կազմակերպությունների համար կրթական համակարգի կարևորագույն խնդիրներին անդրադառնալու առիթ է։ Այսօր գիտելիքի և կրթության ոլորտն այնպես արագ է փոփոխվում, որ մենք պետք է այս շաբաթվա ընթացքում փորձենք հասկանալ այս ոլորտի մեզ հուզող խնդիրները և ուրվագծել հետագա խնդիրները։ Անհրաժեշտ է նաև հասցնել յուրաքանչյուրի գիտակցությանը, որ կրթություն ստանալը երբեք ուշ չէ, և դա կախված չէ հասարակական կարգավիճակից»,- ասաց Աշոտյանը ծրագրի բացման ընթացքում։
Նրա խոսքերով` տասնյակ տարիների ընթացքում Հայաստանում պետությունն ուշադրություն է դարձրել կրթության ֆորմալ ենթակառուցվածքների զարգացմանը, նախադպրոցական, միջին և բարձրագույն կրթության զարգացմանը։ Այժմ ժամանակն է, որպեսզի կրթության ոլորտի պետական քաղաքականության էպիկենտրոնում առաջ գա կրթության նոր լրացուցիչ ձև մեծահասակների համար։
«Այս համակարգն արևմտյան երկրներում կայացել է ավելի քան 10 տարի առաջ, և մեր խնդիրն է կիրառել այն մեր իրականության մեջ»,- ընդգծեց նախարարը։
Աշոտյանը կարծում է, որ մեծահասակների համար լրացուցիչ կրթությունը՝ որպես տնտեսության զարգացման անհրաժեշտ ձև, ենթադրում է, առաջին հերթին խնդիրների լուծում գործազրկության ոլորտում, քանի որ միշտ չէ, որ քաղաքացիների գիտելիքները կարող են օգտագործվել նոր պայմաններում, ինչի հետևանքով նրանք զրկվում են մասնագիտությամբ աշխատելու հնարավորությունից։
Այդ պատճառով, նրա կարծիքով, տնտեսության և գիտության զարգացմանը զուգահեռ անհրաժեշտ է ստեղծել պայմաններ, որպեսզի նույնիսկ բազային կրթություն ստանալուց հետո մեծահասակները լրացուցիչ կրթություն ստանալու հնարավորություն ունենան և հարմարվեն աշխատաշուկայի նոր պահանջներին։
«Այս գործում տնտեսական նշանակությունը մեծ է, բայց կարևոր է նաև հոգեբանական գործոնը՝ լրացուցիչ կրթության ստացումը հնարավորություն է մեծահասակների համար բավարարել իրենց ներքին կրթության պահանջները»,- ասաց կրթության նախարարը։
Աշոտյանը նշեց, որ Հայաստանի հասարակական կազմակերպությունները և միջազգային հաստատությունները պատշաճ ուշադրություն են դարձնում այդ խնդիրներին, և պետությունը կողմ է այս նախաձեռնությանը։ «2010-2011 թվականներին կրթության զարգացման մշակված ծրագրում անպայմանորեն կարտացոլվեն այս խնդիրները։ Ավելին` շուտով կներկայացվի լրացուցիչ կրթության նոր հայեցակարգը»,- հավաստիացրեց նախարարը։
«Մեծահասակների կրթության շաբաթ» ծրագիրը կանցկացվի հոկտեմբերի 19-25-ը։ Ծրագրի շրջանակներում նախատեսված են կոնֆերանսներ, խորհրդակցություններ, պետական և հասարակական հատվածների տարբեր ներկայացուցիչների հանդիպումներ։ -0-
