ԵՐԵՎԱՆ, 19 հոկտեմբերի. /Նովոստի-Արմենիա/. ՀՀ Վայոց Ձորի Արենի գյուղում շաբաթ օրը գինու փառատոն է անցկացվել, որի ժամանակ մարզի գինու ինը գործարան և ֆերմերային տնտեսություն ներկայացրել են իրենց գինիները:
Փառատոնի անցկացման վայրը հատուկ էր ընտրվել, քանի որ հենց Վայոց Ձորի մարզում է աճեցվում խաղաղի հայտնի Արենի տեսակը, որից պատրաստվում է «Արենի» հայկական գինին:
Արենիի գյուղապետարանը, որը կազմակերպել էր փառատոնը՝ ՀՀ էկոնոմիկայի նախարարության ու Գյուղի և ագրոբիզնեսի զարգացման կենտրոնի (CARD) աջակցությամբ, փառատոնին ազգային երանգ էր հաղորդել:
Գյուղ մտնելիս փառատոնի բոլոր հյուրերին դիմավորում էին ավանդական աղուհացով, իսկ արդեն գյուղում հյուրերը կարող էին հետևել հայկակային ազգային կերակուրների պատրաստմանը, թխել լավաշ, գաթա, Արենի գինի համտեսել, ինչպես նաև հրապարակում հետևել, թե ինչպես են առաջներում խաղող ճզմել:
Գինու փառատոնին ներկա են եղել ՀՀ էկոնոմիկայի նախարար Ներսես Երիցյանը և Ուկրաինայի արդյունաբերական քաղաքականության նախարար, առևտրատնտեսական համագործակցության հայ-ուկրաինական միջկառավարական հանձնաժողովի համանախագահ Վլադիմիր Նովիցկին, ով գտնվում է Հայաստանում՝ միջկառավարական հանձնաժողովի հերթական նիստի շրջանակներում:
Ներսես Երիցյանը հայտարարել է, որ իր գլխավորած գերատեսչությունն ու Հայաստանի կառավարությունը միշտ աջակցելու են նման միջոցառումների կազմակերպմանը:
Նա ավելացրել է, որ Արենի գյուղը Հայաստանի համար հատուկ նշանակություն ունի:
Հայաստանում արտադրվում են գինու բոլոր տեսակները՝ քաղցր, կիսաքաղցր, թունդ, աղանդերային, կարմիր և սպիտակ: Հայկական գինիները բազմաթիվ անգամ հաղթել են միջազգային ցուցահանդեսների ժամանակ: Մասնավորապես, հայկական խերեսը հաղթել է Իսպանիայում անցկացվող ցուցահանդես-վաճառքի ժամանակ, իսկ պորտվեյնը՝ Պորտուգալիայում, Լիլիթ, Արենի, Բերդ, Նազելի, կագոր Գետաշեն կարմիր գինիները, Արաքս, Հայրում, Արևիկ, Մասիս սպիտակ գինիները միջազգային ցուցահանդեսներում արժանացել են տարբեր տեսակի մեդալների:-0-
