ԵՐԵՎԱՆ, 19 հոկտեմբերի. /Նովոստի-Արմենիա/. Համաշխարհային բանկի կառավարիչ-տնօրեն Նգոզի Օկոնջո-Իվիլան շաբաթ օրը ՀՀ վարչապետ Տիգրան Սարգսյանի հետ տեղի ունեցած հանդիպման ընթացքում գոհունակություն է հայտնել երկրում իրականացվող հակաճգնաժամային միջոցառումների կապակցությամբ:
«Հայաստանում իրականացվող հակաճգնաժամային միջոցառումները, ինչպես նաև Համաշխարհային բանկի հետ երկրի համագործակցությունը լավ օրինակ են», - մեջբերել են Օկոնջո-Իվիլայի խոսքերը ՀՀ կառավարության մամուլի ծառայությունից:
Համաշխարհային բանկի կառավարիչ-տնօրենի խոսքերով, այդ օրինակը նա հաճախ ներկայացնում է այլ երկրներում` որպես հաջող գործակցության բանաձև։
«Հայաստանը լավագույններից մեկն է խնդիրներին օպերատիվ արձագանքելու առումով, և այս հանգամանքը Համաշխարհային բանկի հետ հարաբերություններում համարվում է կարևոր բաղադրիչ», - ասել է Օկոնջո-Իվիլան:
Նա աջակցություն է հայտնել ՀՀ կառավարության կողմից իրականացվող բարեփոխումներին, մասնավորապես հարկային ու մաքսային վարչարարության բարելավման, կառավարման թափանցիկության ու հակակոռուպցիոն ծրագրերին՝ հավաստիացնելով, որ Հայաստանում գրանցվող առաջընթացը վստահություն է ներշնչում և հնարավորություն է տալիս իրականացվելիք նոր ծրագրերի համար ստանալ համակողմանի օժանդակություն։
Օկոնջո-Իվիլայի խոսքերով, չնայած համաշխարհային ֆինանսատնտեսական ճգնաժամն իր բնույթով աննախադեպ է, Հայաստանը ճիշտ է արձագանքել դրան, ինչը հույս է ներշնչում, որ երկարաժամկետ հեռանկարում կառավարության տնտեսական քաղաքականությունը հնարավորություն կտա Հայաստանին անցում կատարել ցածր միջին եկամուտ ունեցող պետություններից դեպի բարձր միջին եկամուտ ունեցող երկրների խումբ, և այս հարցում թե Համաշխարհային բանկը, թե Միջազգային ֆինանսական կորպորացիան աջակցում են ՀՀ կառավարության ջանքերին։
ՀԲ կառավարիչ-տնօրենը բարձր է գնահատում ու սատարում է Հայկական աշխարհի հայեցակարգին, քանզի «դա ժամանակակից աշխարհում Հայաստանի հիմնական մրցակցային առավելություններից մեկն է»: Այս կապակցությամբ նա բերել է իր դստեր օրինակն, ով ուսումնառության տարիներին բարեկամացել է բազմաթիվ կարող ու հեռանկարային հայ մասնագետների հետ։
Անդրադառնալով հայ-թուրքական հարաբերությունների կարգավորման գործընթացին՝ Համաշխարհային բանկի կառավարիչ- տնօրենը նշել է, որ կազմակերպությունը շահագրգիռ է դրա շարունակականությամբ:-0-
