Երևանն ու Կիևը համարում են, որ երկկողմ տնտեսական հարաբերություններում չօգտագործված մեծ ներուժ կա
ՀՀ նախագահ Սերժ Սարգսյանը շաբաթ օրը Ուկրաինայի արդյունաբերական քաղաքականության նախարար, հայ-ուկրաինական առևտրատնտեսական համագործակցության միջկառավարական հանձնաժողովի համանախագահ Վլադիմիր Նովիցկու հետ քննարկել է տնտեսական համագործակցության ակտիվացմանն առնչվող հարցեր:
«Նախագահ Սարգսյանն ընդգծել է հայ-ուկրաինական միջկառավարական հանձնաժողովի աշխատաքն ակտիվացնելու և ավելի համակարգված դարձնելու անհրաժեշտությունը` նշելով, որ այն լուրջ խթան կլինի տնտեսական գործակցության զարգացման համար», - «Նովոստի-Արմենիա» գործակալությանը տեղեկացրել են ՀՀ նախագահի մամուլի ծառայությունից:
Կողմերը համակարծիք են եղել, որ երկու երկրների միջև ապրանքաշրջանառության ծավալը և վերջին շրջանում համաշխարհային ֆինանսատնտեսական ճգնաժամով պայմանավորված` դրա նվազումը, չի համապատասխանում իրական հնարավորություններին:
Զրուցակիցների կարծիքով, տնտեսական հարաբերություններում կա չօգտագործված մեծ ներուժ և միջկառավարական հանձնաժողովը պետք է այն իրացնելու ուղղությամբ լուրջ միջոցներ ձեռնարկի:
Որպես փոխգործակցության հեռանկարային ուղղություններ՝ նշվել են մեքենաշինության, ավիացիայի, գյուղատնտեսության, տեղեկատվական տեխնոլոգիաների ոլորտները:
Նախագահ Սարգսյանը կարևորել է նաև գործակցության ակտիվացումը հումանիտար ոլորտում:-0-
