«Ժառանգություն» կուսակցությունը կմասնակցի «Դաշնակցության» հանրահավաքին և հանդես կգա հայտարարությամբ
«Ժառանգություն» ընդդիմադիր կուսակցության ներկայացուցիչները կմասնակցեն «Դաշնակցության»՝ հոկտեմբերի 16-ին ծրագրված հանրահավաքին և հանդես կգա հայտարարությամբ, հայտնեց «Ժառանգություն» խորհրդարանական խմբակցության ղեկավար Ստեփան Սաֆարյանը հինգշաբթի մամուլի ասուլիսի ժամանակ:
«Մենք Դաշնակցության հետ ձեռնարկում ենք բոլոր ջանքերը արձանագրությունների վավերացումը կանխելու համար»,- ասաց Սաֆարյանը:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:
Միևնույն ժամանակ Սաֆարյանը նշեց, որ իրենց շարքերում առայժմ չի քննարկվում հարցն այն մասին, թե «Ժառանգություն» խմբակցության կողմից կհաջորդի՞, արդյոք, արձանագրությունների վավերացում՝ հավելելով, որ ինքը չի պատկերացնում վավերացման գործընթացը:
«Անձամբ ես չեմ ցանկանում ներկա լինել այդ պատմական դավաճանության նիստին»,- ասաց Սաֆարյանը՝ ընդգծելով «Ժառանգության» բացասական վերաբերմունքը արձանագրությունների հանդեպ:
«Ժառանգություն» խմբակցության ղեկավարը կարծում է, որ Թուրքիան արձանագրությունների բովանդակության հետ կապված խնդիր չունի, քանի որ դրանցում նրա ազգային շահերին սպառնացող որևէ կետ չկա, այն դեպքում երբ արձանագրություններից երկուսն էլ Հայաստանի ազգային շահերին սպառնացող դրույթներ ունեն:
Սա նշանակում է, որ այսուհետ հայկական կողմի քաղաքականությունը Թուրքիայի հետ հարաբերություններում բացառապես պաշտպանական բնույթ է կրելու, այն դեպքում, երբ Թուրքիան ագրեսիվ նպատակներ է հետապնդում»,- նշեց Սաֆարյանը:
Հայ-թուրքական սահմանը փակ է 1993 թ.-ից՝ պաշտոնական Անկարայի նախաձեռնությամբ: Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-
