Ռուս-Հայկական (Սլավոնական) համալսարանը (ՌՀՀ) հինգշաբթի նշեց իր տասնամյակը։
«Տասը տարին շատ քիչ է, քանի որ համալսարանները հայտնի են դառնում իրենց պատմությամբ և ավանդույթներով։ Բայց մեր դեպքում կարելի է բացառություն անել, քանի որ Ռուս-Հայկական համալսարանը բացառիկ է իր նշանակությամբ»,- լրագրողներին ասաց ՌՀՀ ռեկտոր Արմեն Դարբինյանը։
Ըստ նրա, ՌՀՀ-ն կարողացավ սկսնակ ուսումնական հաստատությունից մինչև «կրթության և գիտության առաջատարի» ուղի անցնել։
«10 տարվա ընթացքում ՌՀՀ-ն արդեն շուրջ 3000 շրջանավարտ է տվել, և նրանք բոլորը համալսարանից դուրս են գալիս ոչ միայն որպես պատրաստված պրոֆեսիոնալներ, այլ նաև իրենց երկրի արժանի քաղաքացիներ»,- ընդգծեց Դարբինյանը։
Նա ավելացրեց, որ ՌՀՀ-ն չի բավարարվի ձեռքբերումներով և կշարունակի զարգանալ։
Բուհի հոբելյանի տոնակատարության արարողությանը շնորհվեցին նաև «ՌՀՀ Տարվա մարդ» ավանդական կոչումները տարբեր անվանակարգերում։
Պարգևատրվածների թվում էին Խորհրդային Միության հերոսներ, լեգենդար հետախույզներ Գևորգ և Գոհար Վարդանյանները, կոմպոզիտոր Ռոբերտ Ամիրխանյանը, «ՀԿԵՈՒ» ՓԲԸ գլխավոր տնօրեն Շևքետ Շայդուլլինը, Հայաստանում Ֆրանսիայի Արտակարգ և Լիազոր դեսպան Սերժ Սմեսովը, բժշկական գիտությունների դոկտոր, պրոֆեսոր Արա Մինասյանը և արվեստագետ Շահեն Խաչատրյանը։
Ռուս-Հայկական (Սլավոնական) պետական համալսարանը ստեղծվել է «Ռուսաստանի Ֆեդերացիայի և Հայաստանի Հանրապետության կառավարությունների Երևան քաղաքում Ռուս-Հայկական համալսարան հիմնադրման և գործունեության պայմանների մասին» պայմանագրի հիման վրա, որը ստորագրվել է 1997-ի օգոստոսի 29-ին Մոսկվայում։
ՌՀՀ-ն խոշոր համալսարան է, որտեղ ուսումնառությունը տարվում է 14 մասնագիտություններով, 11 բաժիններում։ Համալսարանում ուսանում են ավելի քան երկու հազար ուսանողներ, ուսումնառությունն ընթանում է երկաստիճան կրթական համակարգով։
ՌՀՀ-ում դասախոսություններ կարդալու համար հրավիրվում են առաջատար ռուս մասնագետներ, ուսումնառության գործընթացի մեջ այստեղ ներմուծվել են ամենավերջին տեխնոլոգիաները, համալսարանում գործում է հարուստ գրադարան։--0—
