Դաշնակցությունը չի համագործակցի ընդդիմադիր ՀԱԿ-ի հետ. պատգամավոր
Դաշնակցությունն ընդդիմադիր ՀԱԿ-ի հետ չի համագործակցել և համագործակցելու մտադրություն էլ չունի, հայտարարեց ՀՅԴ խորհրդարանական խմբակցության ղեկավար Վահան Հովհաննիսյանը:
«Մենք մեկ նպատակ ունենք և դրան հասնելու միջոցներ (թույլ չտալ վավերացնել հայ-թուրքական արձանագրությունները. «Նովոստի-Արմենիա»): Եթե այդ նպատակի առնչությամբ մեզ հետ ուզի համագործակցել որևէ մի ուժ, մենք դեմ չենք: Բայց մենք երբեք չենք համագործակցել ու չենք համագործակցի ՀԱԿ-ի հետ նրանց ծրագրի շրջանակներում»,- չորեքշաբթի մամուլի ասուլիսի ժամանակ ասաց պատգամավորը:
Հայ Հեղափոխական դաշնակցությունը հայկական ամենահին կուսակցություններից է՝ հիմնադրված 1890թ.-ին: Կուսակցությունը Սոցինտերնի անդամ է: ՀՅԴ հայկական ներկայացուցչությունը 7 հազար անդամ ունի: Կուսակցությունը 10 տարածաշրջանային մասնաճյուղ և բաժանմունք ունի, ՀՀ խորհրդարանում ՀՅԴ-ն ներկայացված է խմբակցությամբ՝ թվով 16 պատգամավորական մանդատով: ՀՅԴ արտասահմանյան ներկայացուցչությունները շուրջ 25 հազար անդամ ունեն:
ՀՅԴ-ն Թուրքիայի հետ հարաբերությունները կարգավորելու հարցում ՀՀ իշխանությունների քայլերի հետ համաձայն չլինելու պատճառով, 2009 թ.-ի ապրիլի 27-ին իշխող քաղաքական կոալիցիայից դուրս գալուց հետո, հրաժարվեց երեք նախարարական պաշտոնից: -0-
