Երևանում հոկտեմբերի 29-30-ը տեղի կունենա կարդիոլոգների եվրակովկասյան համաժողով

Ինչպես չորեքշաբթի «Նովոստի-Արմենիա» գործակալությանը տեղեկացրեցին ՀՀ սփյուռքի նախարարության մամուլի ծառայությունից, համաժողովին կմասնակցեն շուրջ 100 կարդիոլոգներ աշխարհի տարբեր երկրներից (Ռուսաստան, Ֆրանսիա, Ուկրաինա, Ադրբեջան, Թուրքիա, Իսրայել, Լիբանան և այլն) և Հայաստանից:

Համաժողովի նպատակն է հայտնաբերել և համախմբել աշխարհի հայ կարդիոլոգների ներուժը՝ հայ ժողովրդի առողջության պահպանման և Հայաստանում բժշկագիտության զարգացման համար:

Համաժողովը կնպաստի նաև Հայաստանի Հանրապետության և Սփյուռքի կարդիոլոգների համագործակցությանը, մասնագիտական որակների բարձրացմանն ու կատարելագործմանը և արդի մոտեցումների փոխանակմանը:

Հաշվի առնելով Հայաստանի առաջատար դիրքը տարածաշրջանի կարդիոլոգիայի ոլորտում` համաժողովը նոր որակ կհաղորդի կարդիոլոգների հետագա համագործակցությանը:

Համաժողովն անցկացվում է ՀՀ սփյուռքի նախարարության և  «Ակցիա Առողջություն Հայաստան-Ֆրանսիա» կազմակերպության համատեղ նախաձեռնությամբ:-0-