Հայապահպանությանը, Հայաստան-Սփյուռք կապերի խորացմանը, հայ-թուրքական երկխոսությանը վերաբերող հարցեր է քննարկել Հայաստանի նախագահ Սերժ Սարգսյանը «Գալուստ Գյուլբենկյան» հիմնարկության լոնդոնյան գրասենյակի տեսուչ, Մեծ Բրիտանիայի և Իռլանդիայի հայ համայնքների բաժանմունքի ղեկավար, մեծ բարերար Գալուստ Գյուլբենկյանի ծոռ Մարտին Եսայանին և հայկական բաժանմունքի ղեկավար Զավեն Եկավյանի հետ:
Նախագահ Սարգսյանը շնորհակալություն է հայտնել հիմնադրամի ներկայացուցիչներին՝ երկար տարիների հայանպաստ և ազգանվեր գործունեության համար: «Մենք բարձր ենք գնահատում «Գյուլբենկյան» հիմնարկության գործունեությունը, որին, բնականաբար ես քաջատեղյակ եմ. բարձր ենք գնահատում հիմնարկության կողմից ոչ միայն Հայաստանի ներսում կատարվածն, այլև ողջ աշխարհում մեր շահերի պաշտպանության, հայապահպանության ուղղությամբ աշխատանքը»,-ընդգծել է երկրի ղեկավարը։
«Չափազանց կարևորում ենք հաստատության կրթական ծրագիրը և այն համարում համահունչ Հայաստանի զարգացման մեր պատկերացումներին: Հայաստանում վերջերս ստեղծել ենք «Լույս» հիմնադրամը, որը կրթաթոշակ է տրամադրում աշխարհի լավագույն տասը բուհերն ընդունված հայ երիտասարդներին, և կարծում եմ, այստեղ կարող է լինել համագործակցության լայն դաշտ»:
Նախագահ Սարգսյանի սեպտեմբերի 17-ի հրամանագրով՝ ՀՀ անկախության հռչակման 18-րդ տարեդարձի կապակցությամբ, լայնածավալ հայրենանվեր գործունեության, ինչպես նաև մշակույթի բնագավառում ներդրած ծանրակշիռ ավանդի համար «Գալուստ Գյուլբենկյան» հիմնարկության հայկական բաժանմունքի տնօրեն Զավեն Եկավյանը պարգևատրվել է Սուրբ Մեսրոպ Մաշտոց շքանշանով:
Սերժ Սարգսյանը սփյուռքի նախարարության առաջնային խնդիրներն է համարել հայապահպանությունը, հայրենադարձությունը, հայության կարողությունների ամբողջական ու նպատակային օգտագործումը:
Մարտին Եսայանը և Զավեն Եկավյանն իրենց աջակցությունն են հայտնել Հայաստանի և Թուրքիայի միջև հարաբերությունների կարգավորմանն ուղղված նախագահ Սարգսյանի ջանքերին:--0--
