Բուրսա, 13 հոկտեմբերի. /Նովոստի-Արմենիա/. Հայ և թուրք լրագրողները Բուրսայում (Թուրքիա) քննարկում են երկու ժողովրդի միջև հարաբերություններում առկա խնդիրները:
Երեքշաբթի մեկնարկած հանդիպումը ԶԼՄ-ների ներկայացուցիչների համար կազմակերպել են «Եվրասիա-համագործակցություն» հիմնադրամն ու Ստամբուլի Մշակույթի համալսարանին առընթեր GPOT (Global Political Trends Center) թուրքական կազմակերպությունը:
Չորեքշաբթի Բուրսայում 2010թ. աշխարհի առաջնության նախընտրական փուլի շրջանակներում կկայանա Հայաստանի և Թուրքիայի ֆուտբոլային հավաքականների հանդիպումը, որին, ինչպես նախատեսվում է, ներկա կլինի նաև ՀՀ նախագահ Սերժ Սարգսյանը:
Ըստ «Եվրասիա-համագործակցություն» հինադրամի երևանյան գրասենյակի ղեկավար Գևորգ Տեր-Գաբրիելյանի, հանդիպումն անցկացվում է մի ծրագրի շրջանակներում, որի էությունը լրագրողներին միմյանց հետ ծանոթացնելն է:
Նրա խոսքով, ուրախալի է, որ Հայաստանից մասնակցում են նաև մարզային ԶԼՄ-ների, մասնավորապես Գյումրի և Վանաձոր քաղաքների ներկայացուցիչները:
«Մեր բախտը բերեց, որ ստորագրվեցին հայ-թուրքական արձանագրությունները և որ վաղը կկայանա ֆուտբոլային հանդիպումը, սպասվում է Հայաստանի նախագահի այցը Բուրսա: Այս կապակցությամբ հանդիպումը մեծ արձագանք ունեցավ»,- ասաց Տեր-Գաբրիելյանը «Նովոստի-Արմենիա» գործակալության թղթակցի հետ ունեցած զրույցում:
Նրա խոսքով, նման հանդիպումների հիմնական նպատակն այն է, որ լրագրողները, նրանց միջոցով նաև երկրներն առավել լավ ծանոթանան միմյանց, որպեսզի ջանան դուրս գալ առասպելներից:
«Թուրքիայում թևածում է այն կարծիքը, թե հայերը ցանկացած թուրքի Ցեղասպանության մեղավոր են համարում: Բնականաբար, Հայաստանում նման մոտեցում չկա, և դա կարելի է հասկանալ, եթե ավելի հաճախակի դառնան այցերը Հայաստան և զարգանան անձական կապերը, և ոչ թե վերընթերցվեն նյութերը»,- ասաց Գաբրիելյանը:
Նրա խոսքով, այսօր Թուրքիայում կա կարծիքների պլյուրալիզմ, և անգամ այսօրվա միջոցառումից երևում է, որ «ցեղասպանություն» բառը բացարձակապես արգելված չէ. թուրք լրագրողներն ու քաղաքական գործիչները տարբեր կերպ մեկնաբանելով ազատ օգտագործում են այն:
«Այսպիսով, մենք սկսում ենք «առասպելները» հողմացրիվ անել և ճիշտ պատկերացնել, թե ինչպիսին է իրավիճակը Թուրքիայում»,- նշեց Տեր-Գաբրիելյանը:-0-
