ՆԱՏՕ-ն շահագրգռված է Հարավային Կովկասում հակամարտությունների խաղաղ հանգուցալուծմամբ
ԵՐԵՎԱՆ, 13 հոկտեմբերի. /Նովոստի-Արմենիա/. ՆԱՏՕ-ն շահագրգռված է Հարավային Կովկասում հակամարտությունների խաղաղ հանգուցալուծմամբ, երեքշաբթի մամուլի ասուլիսում հայտարարեց Հարավային Կովկասում ՆԱՏՕ-ի պատասխանատու սպա Զբիգնև Ռիբացկին։
«ՆԱՏՕ-ն շահագրգռված է կայուն զարգացող Հարավային Կովկասով։ Հենց դրան են ուղղված ՆԱՏՕ-ի ծրագրերն այս տարածաշրջանի պետություններից յուրաքանչյուրի հետ»,- ասաց ՆԱՏՕ-ի ներկայացուցիչը։
Ռիբացկին ընդգծեց, որ գործընկերության անհատական ծրագրերը հարավկովկասյան երկրներից յուրաքանչյուրի հետ արտացոլում են այդ երկրների ազգային շահերը, բայց միաժամանակ դրանք բոլորն ուղղված են անվտանգության ապահովմանը։
«Յուրաքանչյուր պետություն ինքն է որոշում՝ որքանով սերտորեն է ցանկանում համագործակցել ՆԱՏՕ-ի հետ։ Օրինակ, Հայաստանը որպես նպատակ չի հռչակել իր անդամակցությունը ՆԱՏՕ-ին՝ ի տարբերություն Վրաստանի։ Մենք հարգում ենք Հայաստանի դիրքորոշումը»,- ավելացրեց տարածաշրջանում Դաշինքի ներկայացուցիչը։
Համագործակցությունը Հայաստանի և ՆԱՏՕ-ի միջև ներկայումս կառուցվում է 2005 թվականի դեկտեմբերին ստորագրված Հայաստան-ՆԱՏՕ Անհատական գործընկերության ծրագրին (Individual Partnership Action Plan - IPAP) համապատասխան։
Հայաստանի մասնակցությունը IPAP-ին ենթադրում է պարբերական խորհրդակցությունների անցկացում ՆԱՏՕ-ի հետ տարածաշրջանային անվտանգության վերաբերյալ, այդ անվտանգության ռազմավարության մշակում, Հայաստանի ռազմական դոկտրինի մշակում, պաշտպանական և բյուջետային ծրագրման գործընթացի կատարելագործում և այլ հարցեր։ -0-
