Հայ-թուրքական արձանագրություններն առաջնահերթ կարևորություն ունեն երկկողմ հարաբերությունների կարգավորման համար. հայ փորձագետ

ԵՐԵՎԱՆ, 13 հոկտեմբերի. /Նովոստի-Արմենիա/. Հայ-թուրքական արձանագրություններն առաջնահերթ նշանակություն ունեն հայ-թուրքական հարաբերությունների կարգավորման տեսակետից, ասաց ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը:

«Ես բավականին բարձր եմ գնահատում այն հանգամանքը, որ կողմերը պայմանավորվել են ստորագրել այդ փաստաթղթերը նախապայմաններից հրաժարվելու հիման վրա», - երեքշաբթի ասաց նա «Նովոստի» միջազգային մամուլի կենտրոնում կազմակերպված «Նոր աշխարհաքաղաքական իրավիճակ Արևելքում. հայ-թուրքական մերձեցումը, խնդիրներ և իրողություններ» թեմայով Երևան-Անկարա-Մոսկվա տեսակամուրջի ընթացքում

Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից

Այս կապակցությամբ Սաֆրաստյանը նշեց, որ նման կերպ հիմք է դրվել խորհրդարանների կողմից այդ արձանագրությունների վավերացմանն ու իրագործմանն ուղղված հետագա քայլերի համար:

«Իհարկե, ես հասկանում եմ, որ հայ-թուրքական հարաբերությունների կարգավորման գործընթացը բավականին դժվար է լինելու, սակայն այս անգամ ևս երկու կողմերը կցուցադրեն այդ արձանագրությունների պատրաստման և ստորագրման ժամանակ դրսևորած կամքը», - ասաց նա:

Փորձագետի խոսքերով՝ դրա շնորհիվ կբացվի Հայաստանի և Թուրքիայի միջև սահմանը, ինչպես նաև երկու երկրների միջև կհաստատվեն դիվանագիտական հարաբերություններ:

Կրկնելով, որ գործընթացը դժվարին է լինելու՝ Սաֆրաստյանը դրա վերջնական հաջողության առնչությամբ հույս և համոզմունք հայտնեց:

«Բարենպաստ արդյունքը ելնում է ինչպես Հայաստանի, այնպես էլ Թուրքիայի շահերից», - եզրափակեց նա:

Հայ-թուրքական սահմանը փակ է 1993 թ.-ից՝ պաշտոնական Անկարայի նախաձեռնությամբ: Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ:--0—