Թուրքերի հետ խաղում Հայաստանի հավաքականի խնդիրը հաջող հանդես գալն ու հաղթանակի ձգտելն է. ՀՖՖ նախագահ

ԵՐԵՎԱՆ, 13 հոկտեմբերի. /Նովոստի-Արմենիա/. Հայաստանի ֆուտբոլի հավաքականի առջև դրված հիմնական խնդիրը թուրքերի հետ խաղում հաջող հանդես գալն ու հաղթանակի ձգտելն է, Թուրքիայի Բուրսա քաղաքում լրագրողներին հայտարարել է ՀՀ ֆուտբոլի ֆեդերացիայի նախագահ Ռուբեն Հայրապետյանը:

Ոչ միայն Հայաստանի և Թուրքիայի, այլև հայ-թուրքական հարաբերությունների կարգավորման գործընթացի զարգացման հաջորդականությանը հետևող ողջ համաշխարհային հանրության ուշադրությունը սահուն կերպով տեղափոխվեց Ցյուրիխից Թուրքիայի Բուրսա քաղաք, որտեղ հոկտեմբերի 14-ին 2010 թ.-ի աշխարհի առաջնության ընտրական փուլի շրջանակներում տեղի կունենա Հայաստան-Թուրքիա ֆուտբոլային հանդիպումը:

Հայաստանն ու Թուրքիան հոկտեմբերի 10-ին Ցյուրիխում ստորագրեցին դիվանագիտական հարաբերությունների կարգավորման մասին արձանագրությունները: Ստորագրման արարողությանը ներկա էին Ռուսաստանի, ԱՄՆ-ի և Ֆրանսիայի ԱԳ նախարարներ Սերգեյ Լավրովը, Հիլարի Քլինթոնը և Բեռնար Կուշները, ինչպես նաև Եվրոպական միասնական արտաքին և անվտանգության քաղաքականության բարձր ներկայացուցիչ Խավիեր Սոլանան:

Հայաստանի հավաքականի դարպասապահ Ռոման Բերեզովսկու կարծիքով՝ հնարավոր է, որ Հայաստանի և Թուրքիայի հավաքականների միջև կայանալիք հանդիպումը մեծ հետաքրքրություն չի ներկայացնում՝ որպես սպորտային իրադարձություն, քանի որ երկու հավաքականներն էլ կորցրել են աշխարհի առաջնությանը մասնակցելու հնարավորությունը, սակայն հանդիպումը կարող է ծառայել որպես ավելի կարևոր՝ դիվանագիտական գործիք:

«Լավ է, որ մենք ֆուտբոլի միջոցով կարող ենք որևէ լրացուցիչ լումա ներդնել հայ-թուրքական հարաբերությունների մեջ», - ասել է Բերեզովսկին:

Պատմական հանդիպմանը սպասվում է ՈՒԵՖԱ-ի նախագահ Միշել Պլատինիի և ՖԻՖԱ-ի հատուկ ներկայացուցչի մասնակցությունը: Երկուշաբթի երեկոյան Բուրսայում անվտանգության ուժեղացված միջոցառումների առկայությամբ տեղի է ունեցել հայկական հավաքականի առաջին մարզումը:

Մեկնաբանելով հանդիպման հնարավոր արդյունքը՝ Հայրապետյանն ասել է, որ «եթե մեր հավաքականը նման խաղ ցուցադրեց իսպանացիների հետ, ապա Թուրքիայի հավաքականի հետ հանդիպման արդյունքները պետք է ավելի լավը լինեն»:

2010 թ.-ի աշխարհի առաջնության ընտրական փուլի շրջանակներում իսպանացիներն արտագնա խաղում 2:1 հաշվով դժվարությամբ հաղթեցին Հայաստանի հավաքականին

Հայ-թուրքական հարաբերություններում առաջին տեղաշարժերը նկատվեցին 2008թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։  

Հանդիպման ավարտից հետո Թուրքիայի նախագահը հրավիրել է իր հայ գործընկերոջ Թուրքիա ներկա գտնվելու 2009 թ.- հոկտեմբերի 14-ին կայանալիք երկու երկրների ֆուտբոլի հավաքականների պատասխան խաղին:

Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված:-0-