Հայաստանը համբերատար սպասում է հայ-թուրքական հարաբերությունների հետ կապված իրադարձությունների հետագա զարգացմանը. նախագահ
ԵՐԵՎԱՆ, 12 հոկտմբերի. /Նավաստի-Արմենիա/. Հայաստանը համբերատար սպասում է հայ-թուրքական հարաբերությունների հետ կապված իրադարձությունների հետագա զարգացմանը, Մոսկվա մեկնելուց առաջ օդանավակայանում լրագրողներին հայտնեց Հայաստանի նախագահ Սերժ Սարգսյանը:
«Ցավոք, մեր հասարակությունը ծանոթանում է հայտարարություններին ադրբեջանական կայքերի միջոցով, որոնց հեղինակները փորձում են աղավաղել թուրք պաշտոնյաների հայտարարությունները: Ամեն դեպքում՝ այդ հայտարարությունները եղել են, և, իմ կարծիքով, դրանք հասցեագրված են առաջին հերթին ադրբեջանական լսարանին»,- ասաց Սարգսյանը՝ մեկնաբանելով Թուրքիայի վարչապետ Թայիպ Էրդողանի հայտարարությունն այն մասին, որ Թուրքիան չի բացի Հայաստանի հետ սահմանը մինչև Լեռնային Ղարաբաղի հակամարտության կարգավորումը:
«Հնարավոր է՝ նրանք կարծում էին, թե մենք ոչ բավարար կամք կդրսևորենք և կնահանջե՞նք: Հնարավոր է: Ամեն դեպքում՝ գնդակը թուրքական կողմում է, և մենք բավականին համբերություն ունենք դեպքերի հետագա զարգացմանը սպասելու համար»,- ավելացրեց նախագահը:
Հայկական պետության ղեկավարը նշեց, որ Հայաստանն իր քայլերի մասին հայտարարել է հրապարակավ և աներեր առաջ կընթանա:
«Եթե Թուրքիան վավերացնի արձանագրությունները, մենք կշարունակենք գործընթացը, եթե՝ ոչ, մենք չենք տատանվի և կանենք այն, ինչի մասին հայտարարել ենք»,- ասաց Սարգսյանը:
Հայաստանը և Թուրքիան շաբաթ օրը Ցյուրիխում ստորագրել են երկկողմ հարաբերությունների նորմալացման մասին արձանագրությունները։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հարաբերություններում առաջին տեղաշարժերը նկատվեցին 2008թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Հանդիպման ավարտից հետո Թուրքիայի նախագահը հրավիրել է իր հայ գործընկերոջ Թուրքիա ներկա գտնվելու 2009 թ.- հոկտեմբերի 14-ին կայանալիք երկու երկրների ֆուտբոլի հավաքականների պատասխան խաղին:-0-
