Երևանում մեկնարկել է ՀՅԴ բողոքի ակցիան հայ-թուրքական նախաստորագրված արձանագրությունների դեմ։
Ինչպես «Նովոստի-Արմենիա» գործակալության թղթակցին հայտնեց ՀՅԴ անդամ երթի կազմակերպիչներից մեկը՝ Հրանտ Մարգարյանը, ակցիային մասնակցում է ավելի քան 10 հազար մարդ։
«Այս ակցիայի նպատակն է կոչ անել իշխանություններին հրաժարվել հայ-թուրքական նախաստորագրված արձանագրությունները ստորագրելուց»,- ասաց նա։
«Նովոստի-Արմենիա» գործակալության այն հարցին, թե ընդդիմությունը պահանջելու է արդյո՞ք իշխանության հրաժարականը արձանագրությունների ստորագրման դեպքում, Մարգարյանն ասաց, որ այսօրվանից ՀՅԴ-ն սկսելու է պահանջել իշխանությունների հրաժարականը։
Իրավապահ մարմինների ներկայացուցիչները հրաժարվեցին ստույգ տվյալներ տալ ակցիայի մասնակիցների թվի մասին՝ պատճառաբանելով, որ չունեն նման տեղեկատվություն։
Ակցիան մեկնարկել է Հանրապետության հրապարակից, և ներկայում մասնակիցները մոտենում են նախագահի նստավայրին։ Այնուհետև ակցիայի մասնակիցները կշարունակեն երթը դեպի Հայոց Ցեղասպանության զոհերի հուշարձան՝ Ծիծեռնակաբերդ։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հարաբերություններում առաջին տեղաշարժերը նկատվեցին 2008թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Հանդիպման ավարտից հետո Թուրքիայի նախագահը հրավիրել է իր հայ գործընկերոջ Թուրքիա ներկա գտնվելու 2009 թ.- հոկտեմբերի 14-ին կայանալիք երկու երկրների ֆուտբոլի հավաքականների պատասխան խաղին: –0—
