ԵՐԵՎԱՆ, 8 հոկտեմբերի. /Նովոստի-Արմենիա/. Ֆրանսիայի ԱԳ նախարար Բեռնար Կուշները հույս է հայտնել, որ հայ-թուրքական հարաբերությունների կարգավորման գործընթացում մոտ ժամանակներս շոշափելի արդյունքներ կգրանցվեն, հաղորդում է ՀՀ ԱԳՆ մամուլի ծառայությունից:
Այս մասին Կուշները հայտարարել է աշխատանքային այցով Փարիզում գտնվող ՀՀ ԱԳ նախարար Էդվարդ Նալբանդյանի հետ հանդիպման ընթացքում:
Էդվարդ Նալբանդյանն ու Բեռնար Կուշները մտքեր են փոխանակել հայ-թուրքական հարաբերությունների կարգավորման գործընթացի վերաբերյալ:
Այդ համատեքստում Ֆրանսիայի ԱԳ նախարարը, ողջունելով Հայաստանի և Թուրքիայի միջև հարաբերությունների հաստատման գործընթացը, հույս է հայտնել, որ առաջիկայում այն կունենա շոշափելի արդյունքներ:
Հայաստանի և Ֆրանսիայի արտգործնախարարները, բարձր գնահատելով Հայաստանի և Ֆրանսիայի միջև ձևավորված բարեկամական, սերտ փոխհարաբերությունները, կարևորել են երկու երկրների միջև համակողմանի համագործակցության զարգացման ուղղությամբ հետագա քայլերի ձեռնարկումը:
Հայաստանի և Ֆրանսիայի արտաքին քաղաքական գերատեսչությունների ղեկավարները հանգամանալից զրույց են ունեցել Հայաստան - Եվրոպական Միություն հարաբերությունների և դրանց զարգացման հեռանկարների շուրջ:
Զրուցակիցները քննարկել են նաև արցախյան հիմնախնդրի կարգավորման գործընթացը: Այս կապակցությամբ Էդվարդ Նալբանդյանը բարձր է գնահատել Ֆրանսիայի կառուցողական ներգրավվածությունը` որպես ԵԱՀԿ Մինսկի խմբի համանախագահի:
Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Սպասվում է, որ հոկտեմբերի 10-ին Հայաստանն ու Թուրքիան կստորագրեն սահմանի բացման և դիվանագիտական հարաբերությունների հաստատման մասին արձանագրությունը:-0-
