Հայաստանը թևակոխել է զարգացման որակապես նոր փուլ Թուրքիայի հետ հարաբերությունները կարգավորելու նախագահի նախաձեռնությունից հետո. վարչապետ
Հայաստանը թևակոխել է զարգացման որակապես նոր փուլ հարևան Թուրքիայի հետ հարաբերություններ հաստատելու ՀՀ նախագահ Սերժ Սարգսյանի խիզախ նախաձեռնությունից հետո, կարծում է ՀՀ վարչապետ Տիգրան Սարգսյանը:
«Իրականում ՀՀ նախագահի այս խիզախ նախաձեռնությունից հետո մեր հասարակությունը, քաղաքական ուժերը, քաղաքական միտքը թևակոխել են որակապես նոր փուլ, ստեղծվել է որակապես նոր իրավիճակ, և մենք ձեզ հետ մտածում ենք ապագայի մասին», - ասել է վարչապետը չորեքշաբթի ՀՀ խորհրդարանում կառավարական ժամի ընթացքում:
Կառավարության ներկայացուցչի խոսքերով՝ այժմ հայ-թուրքական հարաբերություններն արդեն վերացական գաղափար չեն. ընթանում է առարկայական քննարկում այն բանի շուրջ, թե ինչ Հայաստանին կտա Թուրքիայի հետ հարաբերությունների բարելավումը, ինչպիսին կլինի իրավիճակը սահմանների բացումից հետո, կտուժի՞, արդյոք, Հայաստանը, թե՞ դուրս կգա հաղթանակած:
«Մենք գտնվում ենք նոր մտածելակերպի դաշտում, ինչը չափազանց կարևոր է երկրի համար, որը նայում է դեպի ապագա, այլ ոչ թե անցյալ», - ասել է վարչապետը:
Պատասխանելով հայ-թուրքական սահմանի մասին պատգամավորների հարցին՝ Սարգսյանը նշել է, որ սահմանների հարցը շատ հստակ է, և Հայաստանը գործ ունի փաստացի գոյություն ունեցող սահմանների հետ: «Ակնհայտ է, որ մենք գործ կունենանք այդ սահմանների հետ նաև ապագայում, մեր քաղաքականությունը բխում է հենց այդ սկզբունքից: Մեր սահմանապահները պաշտպանում են կոնկրետ սահմաններ, որոնք պետք է բացվեն», - հայտարարել է նա:
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հարաբերություններում առաջին տեղաշարժերը նկատվեցին 2008թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Հանդիպման ավարտից հետո Թուրքիայի նախագահը հրավիրել է իր հայ գործընկերոջ Թուրքիա ներկա գտնվելու 2009 թ.- հոկտեմբերի 14-ին կայանալիք երկու երկրների ֆուտբոլի հավաքականների պատասխան խաղին:-0-
