ԱՊՀ երկրների երիտասարդ մանկավարժներն այցելեցին Մոսկվա և հանդիպեցին Ռուսաստանի նախագահի հետ

ԵՐԵՎԱՆ, 7 հոկտեմբերի. /Նովոստի-Արմենիա/. ԱՊՀ երկրների երիտասարդ մանկավարժները, «Դեբյուտների համագործակցություն» միջազգային մրցանակի մրցանակակիրները ԱՊՀ մասնակից երկրների Հումանիտար համագործակցության միջպետական հիմնադրամի (ՄՀՄՀ) հրավերով հոկտեմբերի 5-7-ն այցելեցին Մոսկվա։  

Ինչպես «Նովոստի-Արմենիա» գործակալությանը հայտնեց ՀՀՄՀ մամուլի քարտուղար Ալեքսանդր Կալուգինը, ԱՊՀ երկրների մանկավարժներն այցի շրջանակներում հանդիպեցին Ռուսաստանի նախագահ Դմիտրի Մեդվեդևի հետ։

«Դեբյուտների համագործակցություն» միջազգային մրցանակի մրցանակակիրների այցը ռուսաստանյան մայրաքաղաք նվիրված է հոկտեմբերի 5-ին նշվող Ուսուցչի միջազգային օրվան։

Հանդիպման մասնակիցների խոսքերով՝ ռուսական պետության ղեկավարը բարձր գնահատեց այն առաքելությունը, որը դրված է մանկավարժների վրա։ «Դմիտրի Անատոլյևիչը խոսել է ուսուցիչների գործունեության մասին ժամանակակից պայմաններում։ Նա հատուկ նշեց դպրոցների ուսուցիչների վրա դրված պատասխանատվությունը»,- պատմեց Երևանի 198-րդ միջնակարգ դպրոցի ուսուցիչ Սարգիս Խաչատրյանը։

Խոսելով «Դեբյուտների համագործակցություն» մրցանակի մասին՝ մասնագետները համակարծիք էին, որ «այն դարձավ յուրօրինակ այն սահմանգիծը, որից ցածր մակարդակով մենք ապագայում չենք կարող աշխատել»։ «Հաճելի է նշել, որ այդ պարգևը ոչ միայն իմն է, այլև նրանցն, ով իմ ուսուցիչն է եղել, և դպրոցի ողջ անձնակազմի պարգևն է»,- ասաց Սարգիս Խաչատրյանը։

Սեպտեմբերի 24-ին Քիշնևում Ստեղծագործ և գիտական մտավորականության չորրորդ ֆորումի ընթացքում կայացավ մրցանակակիների պարգևատրման արարողությունը։ Հումանիտար համագործակցության խորհրդի և ԱՊՀ մասնակից երկրների հումանիտար համագործակցության միջպետական հիմնադրամի «Դեբյուտների համագործակցություն» մրցանակն ամեն տարի շնորհվում է ԱՊՀ երկրների հաղթողներին՝ մարդասիրական համագործակցության բնագավառում լավագույն ստեղծագործության, աշխատանքի կամ ձեռքբերման համար։

2009 թվականի մրցույթի հաղթողներն են Գյունել Ֆատալիևան Ադրբեջանից, Սարգիս Խաչատրյանն ու Գայանե Գաբրիելյանը Հայաստանից, Զոյա Վինոգրադովան Բելառուսից, Սամալ Շայահմետովան Խազախստանից, Գուլսանա Տոկտոգուլովան Ղրղզստանից, Մարիա Գրանիչը Մոլդովայից, Անաստասիա Կոմարովան Ռուսաստանից և Սաֆարալի Սայիդովը Տաջիկստանից։ -0-