ԵՐԵՎԱՆ, 7 հոկտեմբերի. /Նովոստի-Արմենիա/. Երևանում անցկացվում է միջազգային գովազդային ֆորում, չորեքշաբթի «Նովոստի» միջազգային մամուլի կենտրոնում լրագրողներին ասաց Հայկական գովազդային խորհրդի նախագահ, «Անտարես» մեդիահոլդինգի ղեկավար Արմեն Մարտիրոսյանը:
Նման հանդիպումները թույլ են տալիս կապ հաստատել պետական քաղաքականության ու գովազդային հանրության միջև, մշակել նոր օրենքներ ու կանոններ, ստեղծել նորմալ պայմաններ գործունեության համար»,- ասաց Մարտիրոսյանը:
Նրա խոսքերով` ֆորումի շրջանակներում կանցկացվեն վարպետության դասընթացներ Ռուս-հայակական (Սլավոնական) համալսարանում՝ այսօրվա դրությամբ միակ բուհում, որտեղ գործում է գովազդի ֆակուլտետ: Մարտիրոսյանը նշեց, որ վարպետության դասընթացները օգտակար կլինեն ուսանողների, շուկայագետների, փոքր բիզնեսի ներկայացուցիչների համար:
Նրա խոսքերով՝ սա 2009 թ.-ին Հայկական գովազդային խորհրդի կողմից կազմակերպված արդեն երկրորդ միջոցառումն է:
2009 թ.-ի ապրիլին Երևանում կայացավ «Գովազդի արդիական խնդիրները» թեմայով միջազգային գիտաժողով, որին մասնակցեցին ՀՀ գովազդային ոլորտի 13 կազմակերպություններ, ԱԺ, բիզնես-հանրության, բանկային միավորումների, հասարակական կազմակերպությունների, ԶԼՄ-ների ներկայացուցիչներ, ինչպես նաև հյուրեր Ռուսաստանից և Ուկրաինայից:
Իր հերթին Միջազգային գովազդային հանձնաժողովի նախագահ Սերգեյ Պիլատովը նշեց, որ ֆորումի շրջանակներում կկայանա ԱՊՀ երկրների հակամենաշնորհային քաղաքականության միջպետական խորհրդին կից գովազդի համակարգող խորհրդի հինգերորդ նիստը:
«Այս կազմակերպությունը միավորում է և գովազդային հանրությունների ղեկավարներին, և հակամենաշնորհային գերատեսչությունների ղեկավարներին, իսկ նրա խնդիրը վերահսկող ու կանոնակարգող պետական մարմինների և գովազդային հանրության շահերը մերձեցնելն է»,- ընդգծեց Պիլտովը:
Միջազգային գովազդային ֆորումը Երևանում մեկնարկել է հոկտեմբերի 6-ին և կտևի մինչև հոկտեմբերի 10-ը:
2005թ.-ին ստեղծված Հայկական գովազդային խորհրդի նպատակը սպառողներին պաշտպանելն է անբարեխիղճ, հավասարության կանոնները անտեսող և կեղծ գովազդից, ինչպես նաև կանոնակարգող գործառույթների իրացումը գովազդի շուկայում «Գովազդի մասին» օրենքի համաձայն։ -0-
