ՀՀ ԱԺ պատգամավորները չորեքշաբթի նիստի ժամական երրորդ և վերջնական ընթերցմամբ ընդունել են «Ոչ նյութական մշակութային ժառանգության» մասին օրենքը, որը ազգային մշակույթի և ավանդույթների պահպանման միջոցների խստացում է նախատեսում:
Ինչպես հայտարարեց ՀՀ մշակույթի փոխնախարար Արթուր Պողոսյանը, մինչ այս օրինագծի մշակումը հայկական օրենսդրությամբ կարգավորվում էր միայն հայ ժողովրդի նյութական մշակութային ժառանգության պահպանումը:
«Դա չի նշանակում, որ ոչ նյութական մշակութային ժառանգության պահպանումն ամբողջովին անտեսված էր: Ընդհակառակը, 2005թ.-ին Հայաստանը վավերացրել է Ոչ նյութական մշակութային ժառանգության մասին ՅՈՒՆԵՍԿՕ-ի կոնվենցիան, իսկ 2006թ.-ին հաստատել է համապատասխան հայեցակարգը», - ասաց նա:
Փոխնախարարի խոսքերով, օրինագիծը սահմանում է ոչ նյութական մշակութային ժառանգության հիմնական հասկացությունները, այն կրողներին, դրա պահպանման միջոցները:
Մասնավորապես, ինչպես տեղեկացրեց Պողոսյանը, օրինագիծը որպես ոչ նյութական մշակութային ժառանգություն ընդունում է ժողովրդական բանահյուսությունը (լեզուն, բարբառները, ժողովրդական երգն ու պարը), կատարողական արվեստը (տաղը, էպոսները), ժողովրդական ժառանգությունը (ժողովրդական տոնակատարություններն ու ծեսերը, երեխաների դաստիարակման ավանդույթները), ազգային խոհանոցը, ինչպես նաև խաղերը:
ՀՀ մշակույթի փոխնախարարն ավելացրեց, որ օրինագիծը սահմանում է ոչ նյութական մշակութային ժառանգության պետական աջակցության հիմնական ուղղությունները, սահմանագծում է պետական իշխանության, տարածքային և տեղական ինքնակառավարման մարմինների լիազորությունները ժառանգության պահպանման գործում, ինչպես նաև այդ գործընթացում ֆիզիկական և իրավաբանական անձանց, այդ թվում նաև օտարերկրացիների մասնակցությունը:
«Օրինագիծը հնարավորություն է ստեղծում պահպանել արտերկրում գտնվող հայկական ոչ նյութական մշակութային ժառանգությունը: Մասնավորապես, Արևմտյան Հայաստանում (այժմ՝ Թուրքիայի տարածք - «Նովոստի-Արմենիա») դեռևս կան հայ ժողովրդի մշակույթի և կենցաղի կրողներ, որոնց մենք պարտավոր ենք պահպանել», - նշեց նա:
Պողոսյանի խոսքերով, արտերկրում հայկական ժառանգության պահպանումը իրականացվելու է երկկողմ պայմանագրերի հիման վրա, մասնավորապես՝ այժմ Բուլղարիան նման պայմանագրի հիման վրա իր տարածքում արդեն անցկացնում է համապատասխան ուսումնասիրություններ:-0-
