Բարաք Օբաման խոստացել է աջակցել Հայաստանի և Թուրքիայի միջև հարաբերությունների կարգավորման բանակցային գործընթացին, հաղորդում է Սպիտակ տակ մամուլի ծառայությունը:
«Նախագահը ՀՀ նախագահ Սերժ Սարգսյանի հետ հեռախոսազրույցի ընթացքում աջակցել է Թուրքիայի հետ հարաբերությունների կարգավորման գործընթացին: Բարաք Օբաման հիշեցրել է ԱՄՆ-ի դիրքորոշումը, որի համաձայն՝ բանակցությունները պետք է ընթանան առանց որևէ նախապայմանի և ձգձգման: Նախագահը խոստացել է ամբողջովին աջակցել գործընթացին, որը պետք է հանգեցնի երկու երկրների միջև հարաբերությունների կարգավորմանը», - ասվում է երեքշաբթի երեկոյան «ՌԻԱ Նովոստի» ստացված տեղեկատվության մեջ:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Թուրքիայի և Հայաստանի ներկայացուցիչները երկու տարի շարունակ երկկողմ հարաբերությունների կարգավորմանն ուղղված փակ բանակցություններ են անցկացնում Շվեյցարիայում:
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդակցություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար: -0-
