Հայաստանի Մարդու իրավունքների պաշտպան Արմեն Հարությունյանն ընտրվել է Եվրոպական Օմբուդսմանի Ինստիտուտի կառավարման խորհրդի անդամ, հաղորդում է Մարդու իրավունքների պաշտպանի աշխատակազմի տեղեկատվության և հասարակայնության հետ կապերի վարչությունը:
Ինչպես նշվում է տեղեկատվության մեջ, ընտրությունները տեղի են ունեցել երկուշաբթի Ֆլորենցիայում Եվրոպական Օմբուդսմանի Ինստիտուտի հերթական ամենամյա ընդլայնված համաժողովի ընթացքում:
Ընտրություններին մասնակցել են մոտ 60 երկրի ներկայացուցիչներ, որոնց թվում եղել է նաև ԼՂՀ Օմբուդսման Յուրի Հայրապետյանը, ով լինելով այս կազմակերպության լիիրավ անդամ, մասնակցել է կառավարման խորհրդի ընտրություններին:
«Ընտրությունների ընթացքում հաշվի են առնվում թեկնածուների ներկայացրած տարածաշրջանները, ինչպես նաև իրենց գործունեության բնույթը ազգային, տեղական և տարածաշրջանային մակարդակով», - ասվում է տեղեկատվության մեջ:
Կառավարման խորհրդի անդամները ընտրվում են 2 տարի ժամկետով:
Օմբուդսմանների եվրոպական ինստիտուտը հիմնադրվել է 1988 թվականին` Ավստրիայում: Այս հեղինակավոր կազմակերպության խնդիրներից են մարդու իրավունքների պաշտպանության բնագավառում գիտական հետազոտությունների անցկացումը, քաղաքացիական ազատությունների պաշտպանությունը, օմբուդսմանների հաստատությունների սատարումն ու գիտական օժանդակումը:
Ներկայում եվրոպական բոլոր երկրների օմբուդսմանները հիշյալ կառույցի անդամներ են:-0-
