ԵՐԵՎԱՆ, 6 հոկտեմբերի. /Նովոստի-Արմենիա/. Հայաստանի որոշ քաղաքական ուժերի կողմից հայ-թուրքական արձանագրությունների շահարկումը չի բխում երկրի ազգային շահերից, կարծում է Հայաստանի Հանրապետական կուսակցության խորհրդարանական խմբակցության անդամ Կարեն Ավագյանը։
«Որոշ քաղաքական ուժեր քաղաքական վարկանիշի բարձրացման համար շահարկում են հայ-թուրքական արձանագրությունները, մասնավորապես, Ցեղասպանության և Ղարաբաղյան հակամարտության հարցերը, ինչը ոչ միայն չի բխում ողջ հայության ազգային շահերից, այլև խայտառակություն է հենց իրենց համար»,- երեքշաբթի մամուլի ասուլիսում հայտնեց Ավագյանը։
Նրա խոսքերով` ինչպես Հայաստանում, այնպես էլ սփյուռքում քաղաքական զարգացման ներկայիս փուլում կան մարդիկ, ովքեր մտահոգված են հայ-թուրքական արձանագրությունների ստորագրմամբ և հայ-թուրքական հարաբերությունների հետագա զարգացմամբ։
«Ես հասկանում եմ նման վիճակը և կիսում եմ իմ հայրենակիցների անհանգստությունը։ Բայց երբ որոշ քաղաքական ուժեր սկսում են շահարկել այդ արձանագրությունները, մասնավորապես, Ցեղասպանության հարցը, ապա նրանք պարզապես դավաճանում են պատմական, ազգային և բարոյական արժեքներին, և նման մոտեցումը մեզ համար անընդունելի է»,- ասաց պատգամավորը։
Միաժամանակ քաղաքական գործիչը հավաստիացրեց, որ նախաստորագրված հայ-թուրքական հարաբերություններում չկա որևէ նախապայման ոչ Թուրքիայի, ոչ էլ Հայաստանի կողմից։
«Այս արձանագրություններում չկա որևէ նախապայման, ինչը մեր դիվանագիտության ձեռքբերումն է»,- ընդգծեց նա։
Միաժամանակ Ավագյանը նշեց, որ վերոնշյալ արձանագրությունները, որպես այդպիսին, միջոց չեն, որոնց օգնությամբ կարելի է գտնել երկկողմ հարաբերությունների օրակարգի հարցերի լուծումը, այլ կլինեն դիվանագիտական հարաբերությունների և առկա խնդիրների լուծման ուղիների որոնման մեկնարկ։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ --0--
