Սեպտեմբերի 30-ին Բրեստում Հավաքական անվտանգության պայմանագրի կազմակերպության ազգային անվտանգության խորհուրդների քարտուղարների կոմիտեի նիստին ընդունված որոշումները բխում են Հայաստանի շահերից, կարծում է ՀՀ Ազգային անվտանգության խորհրդի արտաքին անվտանգության վարչության ղեկավար Միշա Մելքոնյանը:
«Հայկական կողմը մի շարք շատ կարևոր առաջարկներ է ներկայացրել, որոնք բխում են Հայաստանի շահերից, և դրանք միաձայն ընդունվել են Անվտանգության խորհրդի մյուս քարտուղարների կողմից: Եվ առջևում մեզ սպասում է այդ ընդունված որոշումներն իրականցնելու մեծ աշխատանք»,- երեքշաբթի լրագրողներին հայտարարեց նա:
Նրա խոսքովч այդ որոշումներին են վերաբերում ՀԱՊԿ արագ արձագանքման հավաքական ուժերի տեխնիկական զինման հարցը, համագործակցությունը ռազմատնտեսական ոլորտում, ՀԱՊԿ անդամ-պետությունների զինվորական կադրերի, իրավապահ մարմինների և հատուկ ծառայությունների աշխատակիցների պատրաստումն ու վերապատրաստումը:
Մելքոնյանը հատուկ ընդգծեց ԱԱՀՈՒ տեխնիկական համալրման կարևորությունը, քանի որ ԱԱՀՈւ-ն ՀԱՊԿ՝ ագրեսիայի ենթարկված անդամ-պետությանը օգնելու կոչված գործիք է:
Նա հայտնեց, որ պայմանավորվածության համաձայն` այն զորամիավորումները, որոնք ՀԱՊԿ անդամ-պետություններն ընդգրկել են ԱԱՀՈւ կազմում, պետք է սպառազինված ու զինված լինեն միասնական չափանիշների համաձայն:
Մելքոնսյանը նշեց, որ ԱԱՀՈւ համաձայնագրի վավերացումից հետո կսկսվի իրականացման փուլը, և այդ ժամանակ բոլոր հարցերը` ներառյալ զինման ու ֆինանսավորման հարցը, կհստակեցվեն ու կկարգավորվեն:
Ընդ որում նա նշեց, որ Ռուսաստանը կարևոր դեր կխաղա այդ ուժերը զինելու և սպառազինելու գործում, քանի որ ԱԱՀՈՒ մասին համաձայնագրի ստորագրումից հետո ՌԴ նախագահ Դմիտրի Մեդվեդևը հայտարարել է, որ «Ռուսաստանը կգործադրի ամեն ջանք, որպեսզի այդ ուժերը միևնույն մակարդակի վրա լինեն` զինված նորագույն զենքով և համապատասխանեն ամենաժամանակակից չափանիշներին»: -0-
