ՀՀ իշխանությունները հայ-թուրքական հարաբերությունների նորմալացման քաղաքականություն են վարում՝ հաշվի չառնելով ողջ հայության կարծիքը
ԵՐԵՎԱՆ, 6 հոկտեմբերի. /Նովոստի-Արմենիա/. ՀՀ իշխանությունները հայ-թուրքական հարաբերությունների նորմալացման քաղաքականություն են վարում՝ աշվի չառնելով ողջ հայության կարծիքը, կարծում է «Ժառանգություն» խմբակցության պատգամավոր Ստեփան Սաֆարյանը:
«Եթե միայն ընդդիմությունը դեմ լիներ այդ արձանագրությունների ստորագրմանը, ապա նման դրությունն ինչ-որ կերպ հասկանալի կլիներ, բայց տվյալ դեպքում խոսքը հայերի մեծամասնության մասին է ոչ միայն Հայաստանում, այլև ամբողջ աշխարհում, որոնք միանշանակ դեմ են ստորագրմանը»,- երեքշաբթի լրագրողներին ասաց Սաֆարյանը:
Նա նշեց, որ իշխանությունների գործողությունները կասկածի տակ են դնում հետագա սերնդի ապագան և կարող են վնաս հասցնել Հայաստան-Սփյուռք կապին:
Պատգամավորը կարծում է, որ այդ փաստաթղթերի ստորագրմամբ Հայաստանը կզրկվի իր պատմական տարածքները վերականգնելու իրավունքից:
«Ես կարծում եմ, որ արևելահայերը իրավունք չունեն կանխորոշել արևմտահայերի ճակատագիրը, քանի որ ստորագրելով այդ համաձայնագրերը՝ Հայաստանի Հանրապետությունը՝ որպես միջազգային իրավունքի սուբյեկտ, ճանաչում է Թուրքիայի տարածքային ամբողջականությունը՝ հրաժարվելով Արմտյան Հայաստանից»,- հավաստեց քաղաքական գործիչը:
Ընդ որում Սաֆարյանը վստահ է, որ ՀՀ իշխանությունները ոչ միայն կստորագրեն, այլև կվավերացնեն հայ-թուրքական նախաստորագրված արձանագրությունները այն ժամկետներում, որոնք սկզբնապես նշվել են: --0--
