ԵՐԵՎԱՆ, 5 հոկտեմբերի. /Նովոստի-Արմենիա/. Կաշառակերության դեմ պայքարը Կրթության և գիտության նախարարության առաջնահերթություններից է, և իրականացվող ծրագրերը լիովին համահունչ են պետական քաղաքականությանը:
Այս մասին ՀՀ կրթության և գիտության նախարար Արմեն Աշոտյանն ասել է ԱՄՆ Միջազգային զարգացման գործակալության հակակոռուպցիոն գործողության մոբիլիզացման ծրագրի ղեկավարի տեղակալ Էդուարդո Ֆլորես-Տրեխոյի հետ աշխատանքային հանդիպման ժամանակ, հայտնում է Կրթության նախարարության մամուլի ծառայությունը:
Ծրագիրը տեխնիկական և ֆինանսական աջակցություն է տրամադրում ՀՀ քաղաքական և պետական կառույցներին` հակակոռուպցիոն ծրագրերի իրականացման գործում:
Էդուարդո Ֆլորես-Տրեխոն տեղեկացրեց, որ պետական կառավարման մարմինների, ինչպես նաև միջազգային և տեղական հասարակական կազմակերպությունների ներկայացուցիչների մասնակցությամբ արդեն կազմակերպվել է հակակոռուպցիոն չորս ֆորում, որոնց ընթացքում քննարկվել են ՀՀ-ում հակակոռուպցիոն քաղաքականության խնդիրները:
Ծրագիրը նախատեսում է Գյումրիում անցկացնել հինգերորդ ֆորումը, որի թեման է` հակակոռուպցիոն տարրի ներգրավումը կրթական ծրագրերում: Ֆորումին նախատեսվում է միջազգային փորձագետների մասնակցություն:
«Կոռուպցիայի դեմ պայքարում հաջողության գրավականը շահառու խմբերի համախմբումն է: Հասարակությունը պետք է լինի այդ պայքարի առաջամարտիկը և միշտ լինի գործողությունների կիզակետում: Եթե հասարակությունը չմասնակցի նշված գործընթացներին, ապա այդ պայքարը դատապարտված է` անկախ ներդրվող ջանքերին»,-նշեց նա:
Արմեն Աշոտյանը կարևորեց ֆորումի անցկացման վայրը` նշելով, որ ապակենտրոնացման քաղաքականությունը համահունչ է ՀՀ կառավարության որդեգրած մարտավարությանը:
Մասնակիցներն անդրադարձան ՀՀ կրթության և գիտության նախարարության, Կրթության ազգային ինստիտուտի և «Ապագան քոնն է» հասարակական կազմակերպության միջև կնքված համագործակցության հուշագրի շրջանակում իրականացվող «Կրթությունն ընդեմ կոռուպցիայի» ծրագրին, որը ֆինանսավորվում է ԱՄՆ Միջազգային զարգացման գործակալության հակակոռուպցիոն գործողության մոբիլիզացման ծրագրի կողմից:
Ծրագիրը ներառում է ուսուցիչների համար հակակոռուպցիոն կրթության մեթոդական ձեռնարկի մշակում, ՀՀ ութ հանրակրթական ուսումնական հաստատությունում պիլոտային դասընթացների կազմակերպում և ուսուցիչների վերապատրաստում:-0-
