Հայ-թուրքական դիվանագիտական հարաբերությունների հաստատման և դրանց զարգացման մասին արձանագրությունները չեն փոփոխվի, հայտարարեց Հայաստանի Հանրապետական իշխող կուսակցության փոխնախագահ Ռազմիկ Զոհրաբյանը։
«Եթե արձանագրությունների գոնե մեկ կետ փոխվի, ապա փաստաթղթերի մշակման բանակցային գործընթացը կվերսկսվի ամենասկզբից»,- երկուշաբթի լրագրողներին ասաց Զոհրաբյանը։
Ըստ նրա, փաստաթղթերում ամենաչնչին փոփոխությունը կփլուզի ողջ բանակցային գործընթացը, և կողմերը ստիպված կլինեն վերսկսել աշխատանքը, սակայն հայտնի չէ, թե ինչի կհանգեցնի այդ գործընթացն այս անգամ։
Նշելով, որ արձանագրությունները կստորագրվեն հոկտեմբերի 10-ին, Զոհրաբյանն ասաց, որ ստորագրման հերթականությունն առայժմ պարզ չէ, բայց, հավանաբար, առաջինն արձանագրությունները կստորագրի Թուրքիան։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդակցություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ»: Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Ինչպես նշեց Զոհրաբյանը, կոալիցիան արդեն հայտարարել է արձանագրությունների ստորագրման համար պատասխանատվություն կրելու իր պատրաստակամության մասին։
«Եթե ստորագրված արձանագրությունները հակասեն Հայաստանի պետական շահերին, ապա կոալիցիան դրա համար պատասխանատվություն կկրի»,- ասաց նա։
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
