ԵՐԵՎԱՆ, 2 հոկտեմբերի. /Նովոստի-Արմենիա/. Հոկտեմբերի 1-ին ՀՀ առողջապահության նախարարությունն ահազանգ է ստացել Վանաձորի մարզային կենտրոնից, առ այն, որ Վանաձորում ինֆեկցիոն բաժանմունք հոսպիտալացվել է թվով 12 հիվանդ` աղիքային երևույթներով (16-49 տարեկան), նախնական ախտորոշումը` սննդային տոքսիկաինֆեկցիա, իսկ ներկա դրությամբ տուժածների թիվը 20 է, տեղեկացնում է ՀՀ առողջապահությնա նախարարության պաշտոնակնա կայքը:
Ահազանգը ստանալուն պես ՀՀ առողջապահության նախարարի հանձնարարությամբ ՀՀ ԱՆ աշխատակազմի ՊՀՀՏ պետ Ա.Վանյանը, ՀՀ ԱՆ գլխավոր վարակաբան Ա.Ասոյանը և համապատասխան մասնագիտական խումբը մեկնել են Վանաձոր:
Տեղում կատարված մանրակրկիտ համաճարակաբանական հետազոտության արդյունքում պարզվել է, որ հիվանդները ս.թ. սեպտեմբերի 29-30-ը «Մաքսբուրգեր» ՍՊԸ-ին պատկանող հանրային սննդի կազմակերպությունում կերել են հավի մսով, սնկով, մայոնեզով պատրաստված աղցան, 12 ժամ անց ինքնազգացողության վատացման պատճառով դիմել են Վանաձորի ինֆեկցիոն հիվանդանոց: Բոլոր հիվանդների մոտ կլինիկական ախտանշանները հիմնականում նույնն են եղել` բարձր ջերմություն` 38-39,50C, ցավ որովայնի շրջանում, սրտխառնոց, փսխում, ընդհանուր թուլություն, գլխացավ, դող, սարսուռ, լուծ:
Առողջապահության նախարարության մասնագետների կողմից անմիջապես կազմակերպվել է ուսումնասիրություն տվյալ հանրային սննդի կազմակերպությունում, որի արդյունքում հայտնաբերվել է, որ սնկով և հավի մսով աղցանը համեմվել է տեղում պատրաստված մայոնեզով, որի բաղադրիչ մասը տնային պայմաններում ստացված կովի կաթն է, ինչպես նաև արձանագրվել են այլ խախտումներ:
Հիվանդների վաղ հայտնաբերման և հիվանդության հետագա տարածումը կանխարգելելու նպատակով տեղում անմիջապես ձեռնարկվել են հակահամաճարակային համալիր միջոցառումներ:-0-
