Երևանի պետհամալսարանի պատմության թանգարանը երկար դադարից հետո բացվել է նոր ցուցադրությամբ

Երևանի պետհամալսարանի պատմության թանգարանը հինգշաբթի բացվել է երկար դադարից հետո՝ բուհի 90-ամյակին նվիրված  նոր ցուցադրությամբ։

«Թանգարանը նախևառաջ ճանաչողական բնույթ է կրում, բայց, միաժամանակ, սիմվոլիկ նշանակություն ունի։ Այդ թանգարանը բացվել է 70-ական թվականների կեսերին և պարունակում է համալսարանի ստեղծման և կայացման պատմության մասին պատմող կարևոր փաստաթղթեր»,- թանգարանի բացման արարողության ժամանակ լրագրողներին հայտնեց ԵՊՀ ռեկտոր Արամ Սիմոնյանը։

Ըստ նրա՝ 90-ականների սկզբին թանգարանը փակվել էր ջեռուցման բացակայության պատճառով, և ցուցանմուշները տեղափոխվել էին պահոց։

«Այսօր մենք հպարտությամբ ասում ենք, որ մեր թանգարանը չի զիջում աշխարհի համալսարանական նմանատիպ որևէ թանգարանի»,- ընդգծեց նա։

Իր հերթին ԵՊՀ Պատմության թանգարանի տնօրեն Ժակ Մանուկյանը հայտնեց, որ նոր ցուցադրության նախապատրաստական աշխատանքները սկսվել են դեռևս 2006 թվականին։

«Թանգարանի հիմնական առաքելությունը ոչ միայն այցելուներին ԵՊՀ-ի, այլև Հայաստանում բարձրագույն կրթության կայացման պատմությանը ծանոթացնելն է»,- ասաց թանգարանի տնօրենը։

Նա նշեց, որ թանգարանին առընթեր այսուհետ կգործի հնագիտական ցուցադրություն, որը կօգնի ԵՊՀ ուսանեղներին և ասպիրանտներին իրենց գիտահետազոտական աշխատանքներում։

«Թանգարանում ներկայացված է շուրջ 5000 բացառիկ փաստաթուղթ, որոնք թվագրվում են նախորդ դարի 20-ականներով, և այլ հետաքրքիր ցուցանմուշներ»,- ասաց Մանուկյանը։ -0-