Ամերիկայի հայ ազգային կոմիտեն (ANCA) դիմել է ԱՄՆ պետքարտուղար Հիլարի Քլինթոնին՝ հայ-թուրքական կարգավորման և հարաբերությունների բարելավման արձանագրությունների ստորագրման հարցում Հայաստանի վրա ճնշում գործադրելուց հրաժարվելու կոչով։
Ինչպես «Նովոստի-Արմենիա» գործակալությանը հայտնեցին ANCA-ից, ամերիկյան վարչակազմը ճնշում է գործադրում Հայաստանի իշխանությունների վրա հայ-թուրքական արձանագրությունների վավերացման հարցում։
«Առայսօր շրջափակման մեջ գտնվող և դեռևս Հայոց ցեղասպանության միջազգային ճանաչման հասնել փորձող Հայաստանի Հանրապետության վզին փաթաթվող այս միակողմանի համաձայնագրերը վավերացման դեպքում հարցականի տակ կդնեն Ցեղասպանության փաստը»,- ասվում է Քլինթոնին ուղղված նամակում։
Նամակի հեղինակների կարծիքով, այս փաստաթղթերը սպառնում են Հայաստանի անվտանգությանը և ռիսկի են ենթարկում Լեռնային Ղարաբաղի ազատությունը։
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները:
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ:
Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:-0-
