Հայաստան ժամանած վեց ջերմող ուղևոր մեկուսացվել և հետազոտվել է՝ Հայաստան A /H1N1 գրիպի վիրուսի ներթափանցումը թույլ չտալու ուղղությամբ կատարվող կանխարգելիչ միջոցառումների շրջանակներում, ասվում է ՀՀ առողջապահության նախարարության պաշտոնական կայքում տեղադրված տեղեկատվության մեջ:
Տեղեկատվության մեջ չի նշվում, թե երբ են հայտնաբերվել վերոհիշյալ ուղևորները: Միաժամանակ ընդգծվում է, որ սահմանվել է հսկողություն 3778 չվերթի նկատմամբ, որոնք Հայաստան են բերել 373638 ուղևոր:
ՀՀ առողջապահության նախարարությունից նշել են, որ վիրուսի ներթափանցումը Հայաստան թույլ չտալու նպատակով ուժեղացվել է հսկողությունը «Զվարթնոց» և «Շիրակ» միջազգային օդանավակայաններում:
«Զվարթնոց» միջազգային օդանավակայանն ապահովված է 2 ջերմացույցով, որը միացված է մոնիտորին և թույլ է տալիս ուղևորների ջերմությունը չափել 1,5-2մ հեռավորությունից:
Օդանավակայանում գործող շուրջօրյա սանիտարակարանտինային կետն ապահովված է մեկուսարանով, ուր կարող են տեղափոխվել կասկածելի հիվանդները, անհատական պաշտպանիչ միջոցներով և ախտահանիչ սարքերով, նյութերով:
Համապատասխան վերահսկողություն է իրականացվում նաև ցամաքային սահմանակետերում:
ՀՀ առողջապահության նախարարության կայքում տեղադրված տեղեկատվության համաձայն, նախօրեին Երևանում տեղի է ունեցել A/H1N1 գրիպի կանխարգելման հարցերի օպերատիվ հանձնաժողովի հերթական նիստը:
Նիստի ընթացքում նշվել է, որ հիվանդացության դեպքեր են գրանցվել Հայաստանի բոլոր հարևան երկրներում: Մասնավորապես վերջին տվյալների համաձայն, Թուրքիայում հայտնաբերվել է 10 դեպք, Վրաստանում՝ 21, Իրան` 285, Ադրբեջան` 1 դեպք: Ռուսաստանում արձանագրվել է 457 դեպք:
ՀՀ առողջապահության նախարարության տվյալների համաձայն, Հայաստանում A/H1N1 գրիպի վիրուսով հիվանդներ այս պահին չկան:-0-
