Ընդդիմադիր «Ժառանգություն» կուսակցության առաջնորդը հիմա էլ որոշել է չհեռանալ խորհրդարանից

ՀՀ ԱԺ պատգամավոր, ընդդիմադիր «Ժառանգություն» կուսակցության առաջնորդ Րաֆֆի Հովհաննիսյանը չորեքշաբթի ետ է վերցրել պատգամավորական մանդատից հրաժարվելու մասին դիմումը:

«Ես համեստորեն ու շարունակաբար աշխատել եմ հանուն հայոց ցեղասպանության միջազգային ճանաչման, Արցախի ճանաչման և մեր հարևանների հետ հարաբերություններն առանց նախապայմանների կարգավորման, բայց այս տարրական սկզբունքներն արհամարհող ներկայիս ռեժիմի գործողությունների պատճառով ես ինձ դավաճանված զգացի և որոշեցի ի նշան բողոքի վայր դնել իմ պատգամավորական մանդատը»,- ասվում է չորեքշաբթի Հովհաննիսյանի տարածած հայտարարության մեջ, հաղորդում է ՌԻԱ Նովոստին:     

Սակայն, Հովհաննիսյանը նշում է, որ ետ է վերցրել իր դիմումը, քանի որ իր հայրենակիցները Հայաստանից և սփյուռքից կոչ են արել իրեն ընդունել մարտահրավերն ու «ուժերի անհավասարությանը հակառակ, օգտագործել ԱԺ տրամադրած սահմանափակ մակերեսը հանուն ճշմարտության ու արդարության գործելու համար»: -0-