Հայաստանի ճանապարհային ոստիկանությունը հոկտեմբերի 1-ից կխստացնի հսկողությունը

ԵՐԵՎԱՆ, 30 սեպտեմբերի. /Նովոստի-Արմենիա/. Հայաստանի ճանապարհային ոստիկանությունը հոկտեմբերի 1-ից կխստացնի հսկողությունը հետիոտնի կողմից երթևեկության կանոնները պահպանելու հարցում:

Ինչպես հայտնում է Ոստիկանության մամուլի ծառայությունը, հոկտեմբերի 1-ին Ֆրանսիայի հրապարակից կմեկնարկի «Պահպանենք երթևեկության կանոնները» նշանաբանով ստուգայցը:

«Ակցիայի ընթացքում ճանապարհային ոստիկանության ծառայության աշխատակիցների ուշադրության կենտրոնում կլինեն հետիոտների կողմից ճանապարհային երթևեկության կանոնների խախտումները»,- ասվում է հաղորդագրության մեջ: 

Ավելի վաղ ՀՀ ճանապարհային ոստիկանության պետ, գնդապետ Մարգար Օհանյանը հայտարարել էր լրագրողներին, որ իր գլխավորած տեսչությունը հոկտեմբերի 1-ից կսկսի պատասխանատվության ենթարկել ճանապարհային երթևեկության կանոնները խախտող հետիոտներին:

Նրա խոսքերով, խախտում կատարած հետիոտները կտուգանվեն 3000 դրամի չափով (շուրջ $8) և բերման կենթարկվեն ոստիկանության բաժանմունք:-0-