Հայ-թուրքական հարաբերությունների նորմալացման գործընթացը նոր-նոր է սկսվում և գտնվում է քաղաքական պիլոտաժի փուլում, ասաց ՀՀ պաշտպանության նախարարության ազգային ռազմավարական հետազոտությունների ինստիտուտի ղեկավար, քաղաքական գիտությունների դոկտոր, գեներալ-մայոր Հայկ Քոթանջյանը:
«Այս փուլը շատ կարևոր է, քանի որ հստակեցվում են բանակցությունների և խորհրդակցությունների հետագա օրակարգի հնարավոր սահմանները»,- չորեքշաբթի «Նովոստի» միջազգային մամուլի կենտրոնում ասաց Քոթանջյանը:
Նա կարևոր համարեց այն, «որ այդ շեմը հաղթահարվի հնարավորինն անթերի ձևակերպումներով», սակայն հավելեց, որ հարկ է հաշվի առնել, որ սա բավականին երկարատև ու ծավալուն գործընթաց է, քանի որ անորոշությունները բավականին շատ են:
«Կարծում եմ, որ բոլոր ձևակերպումներն անթերի չեն, քանի որ հայ-թուրքական հարաբերությունների սկզբնական փուլում կա փորձնական տարր: Սրա հետ մեկտեղ ես կարող եմ հավաստիացնել, որ ինչպես Հայաստանում, այնպես էլ սփյուռքում արտահայտվող ու հրատարակվող տարբեր կարծիքները անխոս հաշվի կառնվեն հետագա փուլերում»,- ընդգծեց նա:
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ:
Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
