Սփյուռքի ներկայացուցիչների՝ հայ-թուրքական արձանագրությունները չստորագրելու մասին կոչը ՀՀ նախագահին կհանձնվի հոկտեմբերի 7-ին Դոնի Ռոստովում

Սփյուռքի ներկայացուցիչների՝ հայ-թուրքական արձանագրությունները չստորագրելու մասին կոչը կհանձնվի ՀՀ նախագահին հոկտեմբերի 7-ին Դոնի Ռոստովում, որտեղ տեղի կունենա ՀՀ նախագահի և հայկական համայնքի ներկայացուցիչների հանդիպումը, հաղորդում է Ռուսաստանի հայերի «Երկրամաս» թերթի կայքը:

Սփյուռքահայերը կազմակերպել են ՀՀ նախագահին, խորհրդարանին և քաղաքական ուժերին ուղղված ուղերձի ստորագրահավաք՝ հայ-թուրքական արձանագրությունները չստորագրելու կոչով:

«Անընդունելի է Թուրքիայի հետ հարաբերությունների կարգավորումը հայ ազգի ազգային և պետական իրավունքների հաշվին: Անընդունելի է Հայաստանի և Թուրքիայի միջև որևէ հարցի լուծում՝ առանց հաշվի առնելու հայ ազգի մեծ մասը կազմող սփյուռքի կարծիքը», - նշվում է կոչում:

Ինչպես հաղորդում է Ռուսաստանի հայերի «Երկրամաս» թերթի լրատվական կենտրոնը, երեք օրվա ընթացքում հավաքվել է 250 ստորագրություն, որոնց մեծ մասը՝ 198-ը, պատկանում է Ռուսաստանից ստորագրողներին: Նաև ստորագրել են հետևյալ երկրների ներկայացուցիչները՝ Հայաստան՝ 15 մարդ, Ուկրաինա՝ 11, Վրաստան՝ 5, ԱՄՆ՝ 4, Լիբանան և Գերմանիա՝ 3-ական մարդ, Մեծ Բրիտանիա, Բելառուս և Էստոնիա՝ 2-ական մարդ, Հարավաֆրիկյան Հանրապետություն, Իսպանիա, Ֆրանսիա, Կանադա և Ֆինլանդիա՝ 1-ական ստորագրություն:

Այս ուղերձը ստորագրողների թվում 31 մարդ տարբեր հասարակական կազմակերպությունների, տպագիր և էլեկտրոնային ԶԼՄ-ների, հանրաճանաչ ինտերնետ-նախագծերի ղեկավարներ և ներկայացուցիչներ են: Ստորագրողներից մեկը ՌԴ սուբյեկտներից մեկի ադմինիստրացիայի աշխատակից է և ևս մեկը՝ ՌԴ սուբյեկտներից մեկի մարզային խորհրդի պատգամավոր:

Ինչպես նշում է «Երկրամաս» թերթի գլխավոր խմբագիր Տիգրան Թավադյանը, «ուրախալի է ստորագրահավաքում մտավորականության, այդ թվում նաև գիտնականների ակտիվ մասնակցությունը»:

Այսպես, ստորագրվածների թվում կա 13 գիտությունների թեկնածու և 9 դոկտոր, որոնցից երկուսը դոցենտներ են և յոթը՝ տարբեր բուհերի պրոֆեսորներ:-0-