«Բանակում» հեռուստասերիալը հարուցել է ՀՀ ԶՈՒ ողջ սպայակազմի դժգոհությունն ու վրդովմունքը

ԵՐԵՎԱՆ, 30 սեպտեմբերի. /Նովոստի-Արմենիա/. «Բանակում» հեռուստասերիալը հարուցել է ՀՀ ԶՈՒ ամբողջ սպայակազմի դժգոհությունն ու վրդովմունքը, երեքշաբթի «Նովոստի-Արմենիա» գործակալությանը տեղեկացրել են ՀՀ պաշտպանության նախարարության հասարակայնության հետ կապերի վարչությունից՝ մեկնաբանելով տեղական թերթերից մեկում տպագրված հրապարակումը:

Հրապարակման համաձայն՝ «Շանթ» հեռուստաալիքով հեռարձակվող «Բանակում» սերիալը, որը պատմում է ՀՀ ԶՈՒ-ում ծառայության մասին, շուտով կփակվի՝ ՀՀ պաշտպանության նախարար Սեյրան Օհանյանի դժգոհության պատճառով:

«Հեռուստասերիալը, իրոք, հարուցել է ՀՀ ԶՈՒ ողջ սպայակազմի դժգոհությունն ու վրդովմունքը, քանի որ այն վարկաբեկում է ազգային բանակը, սխալ է ներկայացնում զինված ուժերի իրական պատկերը, ընդամենը ռուսական հեռուստաալիքներով հեռարձակված սերիալների անհաջող և անճաշակ կրկնօրինակն է», - ասվում է տեղեկատվության մեջ:

Տեղեկատվության համաձայն՝ «Շանթ» հեռուստաընկերության ղեկավարությունը կանի համապատասխան հետևություններ:-0-