Երևանը շահագրգռված է Չինաստանի հետ հարաբերությունների ամրապնդմամբ. ՀՀ նախագահ

ՀՀ նախագահ Սերժ Սարգսյանը հայտարարել է, որ հայկական կողմը շահագրգռված է Չինաստանի հետ հարաբերությունների ամրապնդմամբ:

Ինչպես հայտնում է երկրի ղեկավարի մամուլի ծառայությունը, այս մասին ՀՀ նախագահը հայտարարել է Չինաստանի Ժողովրդական Հանրապետության ազգային տոնի` Հանրապետության հիմնադրման 60-րդ տարեդարձի առթիվ Հայաստանում Չինաստանի դեսպանություն կատարած իր այցի ընթացքում:

«Նախագահը  շնորհավորել է դեսպանին, նաև ջերմ շնորհավորանքներ փոխանցել  ՉԺՀ նախագահ Հու Ձինթաոին, երկրի ղեկավարությանն ու ժողովրդին` մաղթելով հետագա զարգացում և բարգավաճում»,- ասվում է հաղորդագրության մեջ:

Սերժ Սարգսյանն ուրախալի է համարել հանգամանքը, որ ՉԺՀ-ն իր հիմնադրման հոբելյանը դիմավորում է տնտեսությունում և հասարակական կյանքում ձեռք բերած տպավորիչ հաջողություններով:

«Մենք մեծապես շահագրգիռ ենք` ամրապնդելու և խորացնելու մեր կապերը Չինաստանի հետ և կանենք հնարավորը մեր հարաբերությունների հետագա զարգացման համար»,- ասել է նախագահ Սարգսյանը

Հանրապետության նախագահն ու Չինաստանի դեսպանը քննարկել են նաև երկու երկրների միջև առևտրատնտեսական փոխգործակցության զարգացման հեռանկարներին, «Շանհայ Էքսպո` 2010» ցուցահանդեսին Հայաստանի մասնակցությանը, հայաստանյան տնտեսությունում չինական ներդրումների հետագա խթանմանը վերաբերող հարցեր:

ՉԺՀ հռչակման օրը նշվում է հոկտեմբերի 1-ին: -0-