ԵՐԵՎԱՆ, 29 սեպտեմբերի. /Նովոստի-Արմենիա/. Հայ-թուրքական հարաբերությունների կարգավորման արձանագրություններն, ամեն դեպքում, կստորագրվեն մինչև հոկտեմբերի 14-ը, կարծում է Կովկասի Ինստիտուտի տնօրեն Ալեքսանդր Իսկանդարյանը։
«Այսօր քաղաքական գործընթացները՝ հայ-թուրքական հարաբերությունների շուրջ, այնպես են զարգանում, ինչպես և կարելի էր ենթադրել։ Կստորագրվեն հայ-թուրքական հարբերությունների կարգավորման արձանագրությունները հոկտեմբերի 10-ին, 11-ին, թե 12-ին, էական նշանակություն չունի։ Այդ ստորագրումն ամեն դեպքում պետք է տեղի ունենա մինչև հոկտեմբերի 14-ը»,- երեքշաբթի մամուլի ասուլիսի ժամանակ հայտարարեց Իսկանդարյանը։
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ:
Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Իսկանդարյանի խոսքերով, մինչև հոկտեմբերի 14-ը արձանագրությունների ստորագրումը բացատրվում է նրանով, որ հենց այդ օրն է նախատեսված ՀՀ նախագահ Սերժ Սարգսյանի այցը Թուրքիա՝ երկու երկրների հավաքականների ֆուտբոլային հանդիպումը դիտելու։
«Ստորագրումը տեղի կունենա Սարգսյանի այցից առաջ»,- ընդգծեց Իսկանդարյանը։
Մի քանի օր առաջ թուրքական կառավարության ղեկավար Ռեջեփ Թայիփ Էրդողանը հայտարարել էր, որ Թուրքիայի և Հայաստանի միջև դիվանագիտական հարաբերությունների հաստատման համաձայնագիրը կստորագրվի հոկտեմբերի 10-ին։
Միաժամանակ քաղաքագետը հատուկ նշանակություն չտվեց այն հանգամանքին, թե ի՞նչ մակարդակով կստորագրվեն արձանագրությունները՝ ԱԳՆ մակարդակով, թե նախագահների մակարդակով, քանի որ երկու դեպքում էլ ստորագրող կողմերը կներկայացնեն իրենց երկիրը պետական մակարդակով։
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
