Հայկական կինոն ժամանակի ընթացքում հանրաճանաչ է դառնում արտասահմանում, ինչի մասին է վկայում «Սահման» ֆիլմին ամենաբարձր պարգևներից մեկի շնորհումը, ուրբաթ մամուլի ասուլիսի ժամանակ հայտարարեց ֆիլմի ռեժիսոր, «Ոսկե ծիրան» Երևանյան միջազգային կինոփառատոնի տնօրեն Հարություն Խաչատրյանը։
Հարություն Խաչատրյանի «Սահման» ֆիլմը լավագույն ռեժիսուրայի մրցանակ է ստացել ԱՊՀ և Մերձբալթյան երկրների «Կինոշոկ» Կինոյի բաց փառատոնում։
«Ինչպես ցանկացած ռեժիսորի, ինձ համար նույնպես հաճելի է, որ իմ ֆիլմը արժանացել է նման բարձր պարգևի, բայց ավելի շատ ես ուրախ եմ, որ հայկական ֆիլմն է մրցանակ ստացել»,- ասաց Խաչատրյանը։
Նրա խոսքերով, հայկական կինոն վատ է քարոզվում հենց երկրի ներսում, չկան կինոակումբներ, որտեղ հնարավոր լինի դիտել հայրենական ֆիլմերը, քննարկել դրանք։
«Շատ է խոսվում այն մասին, որ հայկական կինո գոյություն չունի, մինչդեռ այն զարգանում է, թեև դանդաղ։ Ավելի ու ավելի շատ հայկական ֆիլմեր են ներկայացվում միջազգային կինոփառատոներին և հաջողություն ձեռք բերում»,- ասաց ռեժիսորը։
Նա հայտնեց նաև, որ արդեն մեկ ամիս գործում է «Ոսկե ծիրանի» կինոդպրոցը, որտեղ երիտասարդ տաղանդավոր մարդիկ ֆիլմ նկարահանել են սովորում։
«Սահմանը» ֆիլմը պոետիկ դրամա է հայ-ադրբեջանական սահմանը հատող գոմեշի մասին: Վերջինը ֆիլմի գլխավոր հերոսն է, որի օգնությամբ վեր են հանվում 2 հարևան ժողովուդների միջև գոյություն ունեցող բարդ հիմնախնդիրները, սահմանամերձ գյուղի կենցաղը, մարդկանց կրոնական ու մշակութային առօրյան: Գոմեշի պատմությունն իրական է, Հարություն Խաչատրյանն անձամբ դրա ակնատեսն է եղել: Այժմ կինոյի լեզվով վերաշարադրելով այդ պատմությունը` նա փորձել է առանձին կերպարների օգնությամբ ցույց տալ պատերազմի իրական դեմքը: Ֆիլմի միջոցով ռեժիսորն առաջարկում է քանդել գոյություն ունեցող բոլոր սահմանները:-0-
