Հայ-թուրքական սահմանի բացման հնարավորությունը Հայաստանի ազգային անվտանգության մեծագույն սպառնալիքն է. փորձագետ
Հայ-թուրքական սահմանի բացման հնարավորությունը Հայաստանի ազգային անվտանգության մեծագույն սպառնալիքն է, կարծում է «Միտք» վերլուծական կենտրոնի փորձագետ Էդգար Էլեմյանը։
«Կարճ ժամանակում Հայաստանի ողջ տնտեսությունը կհայտնվի թուրք ձեռնարկատերերի ձեռքերում։ Ընդ որում, ոչ միայն բիզնեսն, այլ նաև ռազմավարապես կարևոր օբյեկտներն, ինչպիսիք են կապը, տրանսպորտը, էներգետիկան, ջուրը»,- ուրբաթ ասաց փորձագետը։
Էլեմյանը կարծում է, որ ամենամեծ վտանգը Թուրքիայի հավանական տնտեսական առաջխաղացումն է։
Ըստ նրա, այն պայմաններում, երբ Թուրքիայից դեպի Հայաստան ներկրումը տարեկան կազմում է 178 մլն դոլար, իսկ արտահանումը Հայաստանից դեպի Թուրքիա՝ 1,8 մլն դոլար, միամիտ կլինի մտածել, թե հայկական տնտեսությունն ի վիճակի է դիմակայել նման վտանգին։
Միաժամանակ Էլեմյանը նշեց, որ սահմանների բացումը քիչ հավանական է համարում, քանի որ «ոչ հայ, ոչ թուրք ժողովուրդները դրան դեռ պատրաստ չեն»։
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
