Երևանի պետական համալսարանի (ԵՊՀ) 90-ամյակին նվիրված տոնական միջոցառումները կանցկացվեն Երևանում ընթացիկ տարվա սեպտեմբերի վերջին-հոկտեմբերի սկզբին։
«Տոնական միջոցառումներին կմասնակցեն ավելի քան 60 հյուրեր, այդ թվում՝ ԱՄՆ-ից, Անգլիայից, Ֆրանսիայից, Իտալիայից, Գերմանիայից, Ռուսաստանից, Ուկրաինայից, Եգիպտոսից, Սիրիայից, Իրանից, Լեհաստանից, Վրաստանից, նրանց թվում կլինեն համալսարանների ռեկտորներ, գիտահետազոտական ինստիտուտների տնօրեններ, ինչպես նաև ԵՊՀ գործընկեր-բուհերի աշխատակազմերի ներկայացուցիչներ»,- ուրբաթ լրագրողներին հայտնեց համալսարանի ռեկտոր Արամ Սիմոնյանը։
Նա նշեց, որ հոբելյանական միջոցառումների տոնական կազմակերպումը սկսվել է մայիսից, և դրանց թվում են մի քանի միջազգային խորհրդաժողովները, ինչպես նաև Հայաստանում առաջին անգամ կազմակերպված Սոցիոլոգների համաշխարհային կոնգրեսը։
Սիմոնյանի խոսքերով, սեպտեմբերի 29-ին ԵՊՀ-ում տեղի կունենա գրքերի շնորհանդես, որը նվիրված է բուհի 90-ամյակին։ Գրքերի առաջին փորձնական օրինակները պատրաստ կլինեն մոտ օրերին։
«Դրանց թվում են՝ «Երևանի պետական համալսարան. տարեգրություն» շատ կարևոր հանդեսը, որում ընդգրկված է մեր բուհի ողջ պատմությունը՝ սկսած հիմնադրումից ընդհուպ 2009 թվականի հուլիսը»,- ասաց նա։
ԵՊՀ ռեկտորը նշեց, որ այդ օրը կներկայացվեն նաև այնպիսի գրքեր, ինչպիսիք են «ԵՊՀ. կենսագրական հանրագիտարան», որն ընդգրկում է ԵՊՀ հայտնի և առաջատար ներկայացուցիչների կենսագրական տվյալները, «ԵՊՀ-ն փաստաթղթերում», որում հավաքվել են ԵՊՀ-ն հիշատակող բոլոր պաշտոնական փաստաթղթերը, մեծ նկարազարդ ալբոմ բուհի մասին, ինչպես նաև «Համալսարանի քնարը» և «Լույսն ափի մեջ» հավաքածուները։ Վերջին հանդեսում ընդգրկված են ղարաբաղյան պատերազմի ժամանակ զոհված ԵՊՀ բանասիրական ֆակուլտետի ուսանող Սամվել Գևորգյանի ստեղծագործությունները։
«Շնորհանդեսի ընթացքում պատվոգրեր և մրցանակներ կհանձնվեն նաև համալսարանական ականավոր դասախոսներին, գիտնականներին և ուսանողներին»,- ասաց նա, հավելելով, որ մեդալների և շքանշանների նմուշները պատրաստվել են Սանկտ Պետերբուրգի դրամահատարանում։
Սիմոնյանը հայտնեց նաև, որ հոբելյանական հանդիսությունների շրջանակներում տեղի կունենան նաև երկու միջազգային համաժողովներ, որոնցից մեկը նվիրված կլինի 21-րդ դարի համալսարանական կրթությանը, իսկ երկրորդի ժամանակ կդիտարկվեն ընդհանրապես կրթության որակի հարցերը։
«Հոկտեմբերի 3-ին ԵՊՀ մեծ դահլիճում կկայանա ԵՊՀ Խորհրդի և Գիտական խորհրդի համատեղ հանդիսավոր նիստը, որի ընթացքում զեկույցներով հանդես կգան Հայաստանի պաշտոնական դեմքեր և հայկական ու օտարերկրյա բուհերի ներկայացուցիչներ»,- ասաց նա։
Ռեկտորն ըդգծեց, որ նիստից հետո դասախոսների և ուսանողների ուղեկցությամբ տեղի կունենա մասնակիցների տոնական երթ դեպի Սպենդիարյանի անվան օպերայի և բալետի ազգային ակադեմիական թատրոնի շենք, որտեղ երեկոյան կկայանա տոնական համերգ Հայաստանի հայտնի պարային համույթների մասնակցությամբ։
«Շուրջ 300 հոգի, այդ թվում՝ մեր հյուրերն ու ԵՊՀ աշխատակազմը կուղևորվեն դեպի Օպերայի և բալետի պետական թատրոն»,- հավելեց Սիմոնյանը։
Երևանի պետական համալսարանը հիմնադրվել է 1919 թվականին։ Մինչ այսօր Հայաստանի այս ամենախոշոր բուհն է ավարտել շուրջ 90 հազար մարդ: ԵՊՀ 21 ֆակուլտետում այժմ սովորում է 13 հազար ուսանող, ավելի քան 1200 դասախոսից 200-ը գիտությունների դոկտոր են, ավելի քան 500-ը՝ գիտությունների թեկնածու։ --0—
