ԵՐԵՎԱՆ, 25 սեպտեմբերի. /Նովոստի-Արմենիա/. ՀՅԴ-ն պահանջում է ոչ թե ՀՀ նախագահ Սերժ Սարգսյանի հրաժարականը, այլ հայ-թուրքական հարաբերությունների առումով նրա քաղաքական կուրսի փոփոխումը, ուրբաթ մամուլի ասուլիսի ժամանակ ասաց ՀՀ ԱԺ պատգամավոր Արծվիկ Մինասյանը:
Օգոստոսի 31-ի երեկոյան Թուրքիայի և Հայաստանի արտգործնախարությունները, ինչպես նաև Շվեյցարիայի Արտաքին գործերի դեպարտամենտը հայտարարեցին, որ Հայաստանի հետ բանակցություններում, որոնք տարվում են Շվեյցարիայի միջնորդությամբ, պայմանավորվածություն է ձեռք բերվել «Դիվանագիտական հարաբերություններ հաստատելու մասին արձանագրության» և «Երկկողմ հարաբերությունների զարգացման մասին արձանագրության» ստորագրմանը վերաբերող «ներքաղաքական խորհրդատվությունների» սկզբի մասին: Քաղաքական խորհրդատվությունները ծրագրվում է ավարտել վեց շաբաթվա ընթացքում, որից հետո կստորագրվի երկու արձանագրություն, որոնք կհանձնվեն երկու երկրի խորհրդարանների հաստատմանը:
«Մենք նախագահի հրաժարականը չենք պահանջում և չենք ձգտում զբաղեցնել նախագահական աթոռը: Մեր խնդիրը, հանուն մեր երկրի ապագայի, այդ արձանագրությունների ստորագրումը թույլ չտալն է, որոնք, անկասկած, անուղղելի բացասական հետք կթողնեն մեր երկրի հետագա զարգացման վրա»,- ասաց պատգամավորը:
Մինասյանի կարծիքով, այդ արձանագրությունների ստորագրումը կարող է հետագայում հայերի ապագա սերունդներին զրկել Թուրքիայից արևմտյան հայկական հողերը վերադարձնել պահանջելու կամ 1915 թ.-ի Հայոց Ցեղասպանությունը ճանաչելու իրավունքից:
«Ոչ ոք իրավունք չունի հարցականի տակ դնելու զուտ հայկական հողերի հանդեպ ապագա սերունդների իրավունքը»,- ընդգծեց Մինասյանը:
ՀՅԴ-ն սեպտեմբերի 15-ից Հանրապետության հրապարակում կառավարության ու ԱԳՆ շենքերի դիմաց նստացույց և հացադուլ է անցկացնում հայ-թուրքական հարաբերությունների հարցով արձանագրությունների ստորագրման դեմ: Բացի այդ, տվյալ փաստաթղթերի հանդեպ հասարակական վերաբերմունքի ցուցադրման նպատակով ստորագրահավաք է կազմակերպվել:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
