ԵՐԵՎԱՆ, 23 սեպտեմբերի. /Նովոստի-Արմենիա/. «Ժառանգություն» խորհրդարանական խմբակցության ղեկավար Ստեփան Սաֆարյանը չորեքշաբթի խմբակցության անունից պաշտոնապես դիմել է Հայաստանի Հանրապետության Սահմանադրական դատարանին՝ հայ-թուրքական արձանագրությունների հարցով քննարկում անցկացնելու խնդրանքով, հայտնում է կուսակցության մամուլի ծառայությունը:
«Սաֆարյանը պաշտոնապես դիմել է Հայաստանի Հանրապետության Սահմանադրական դատարանի նախագահ Գագիկ Հարությունյանին նախաստորագրված հայ-թուրքական արձանագրությունների` Սահմանադրությանը համապատասխանության հարցի քննարկում կազմակերպելու պաշտոնանամակով»,- ասվում է հաղորդագրության մեջ:
Օգոստոսի 31-ին Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դեպարտամենտը հայտարարեցին, որ պայմանավորվածություն է ձեռք բերվել քաղաքական խորհրդատվություններ սկսել բանակցությունների ընթացքում շվեյցարական միջնորդությամբ նախնական ստորագրած երկու արձանագրությունների` «Երկու երկրների միջև դիվանագիտական հարաբերությունների հաստատման մասին արձանագրության» և «Երկկողմ հարաբերությունների զարգացման մասին արձանագրության» շուրջ:
Ներքաղաքական խորհրդատվությունները կավարտվեն վեց շաբաթվա ընթացքում, ինչից հետո երկու արձանագրություն կստորագրվի և կներկայացվի համապատասխան խորհրդարաններին վավերացման համար:
Ինչպես կարծում է Սաֆարյանը, Սահմանադրական դատարանն իրավունք ունի քննարկում անցկացնել ՍԴ բոլոր անդամների մասնակցությամբ՝ հրավիրելով «Ժառանգություն» խմբակցությունից ԱԺ բոլոր պատգամավորներին: Ընդ որում իր նամակում Սաֆարյանը նշել է, որ այն /նամակը/ պաշտոնական ուղերձ է, որին ՀՀ խորհրդարանի կանոնակարգի համաձայն 10-օրյա ժամկետում պետք է պատասխան տրվի:
ՀՀ Սահմանադրական դատարանին դիմելը «Ժառանգություն» կուսակցության՝ հայ-թուրքական արձանագրությունների առնչությամբ առաջարկած 10 քայլերից մեկն է: «Ժառանգությունը» նաև դիմել է արտաքին հարաբերությունների մշտական խորհրդարանական հանձնաժողովին՝ հայ-թուրքական հարաբերությունների հարցով խորհրդարանական լսումներ անցկացնելու համար, որոնք կկայանան հոկտեմբերի 1-ին:
«Ժառանգություն» կուսակցությունն ու համանուն խմբակցությունը նաև դիմել են ՀՀ կառավարությանը՝ հայ-թուրքական արձանագրությունների առնչությամբ հանրաքվե անցկացնելու խնդրանքով, որը կուղեկցվի երկրի արտաքին քաղաքականության համար պատասխանատու երկրի նախագահի հանդեպ վստահություն ցուցաբերելու հարցով:
Արդյունքում ՀՀ վարչապետ Տիգրան Սարգսյանը ընդդիմադիր «Ժառանգություն» կուսակցության առաջարկած հայ-թուրքական հարաբերությունների և նախագահի վստահության հարցով հանրաքվեի անցկացումը վաղաժամ է համարել:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
