Հայաստանի ԱԳՆ ղեկավարը երկկողմ համագործակցության հարցեր է քննարկել եվրաինտեգրման հարցերով պետքարտուղարի հետ

ԵՐԵՎԱՆ, 23 սեպտեմբերի. /Նովոստի-Արմենիա/. Հայաստանի արտաքին գործերի նախարար Էդվարդ Նալբանդյանը չորեքշաբթի երկկողմ համագործակցության հարցեր քննարկեց Լեհաստանի նախարարների խորհրդի նախագահի տեղակալ եւ եվրաինտեգրման հարցերով պետքարտուղար Միկոլայ Դովգիլևիչի հետ, տեղեկացնում է ԱԳՆ մամուլի ծառայությունը։

«Ողջունելով հյուրին` Էդվարդ Նալբանդյանը կարևորեց երկու երկրների բարեկամական հարաբերությունների զարգացումը,  բարձր մակարդակի քաղաքական երկխոսության ակտիվացումը, տնտեսական կապերի ընդլայնումը, ինչպես նաև մշակութային ոլորտում համագործակցության խթանումը` հաշվի առնելով անհրաժեշտ իրավապայմանագրային հենքի առկայությունը»,- ասվում է հաղորդագրությունում։

Զրուցակիցները հանգամանալից զրույց ունեցան Հայաստանի և ԵՄ համագործակցության շուրջ և այդ ուղղությամբ կատարվելիք քայլերի վերաբերյալ:

Կողմերը կարևորեցին լեհ-շվեդական նախաձեռնությամբ «Արևելյան գործընկերություն» ծրագրի մեկնարկը և դրա ներուժի ամբողջական օգտագործումը, հատկապես` մուտքի արտոնագրերի ստացման ընթացակարգի դյուրացման և ազատ առևտրի համաձայնագրի կնքման հարցերում:

Հյուրի խնդրանքով նախարար Նալբանդյանը ներկայացրեց հայ-թուրքական հարաբերությունների կարգավորման գործընթացը:

Միկոլայ Դովգիլևիչը ողջունեց այդ ուղղությամբ ձեռնարկվող քայլերը և հույս հայտնեց, որ դրանք շոշափելի արդյունքներ կունենան:

Էդվարդ Նալբանդյանը ներկայացրեց նաև արցախյան հիմնախնդրի հանգուցալուծմանն ուղղված բանակցությունների վերջին զարգացումները:-0-