Հայաստանում հոկտեմբերի 1-ից կտուգանվեն երթևեկության կանոնները խախտող հետիոտները

Հայաստանի ճանապարհային ոստիկանությունը հոկտեմբերի 1-ից կսկսի պատասխանատվության ենթարկել այն հետիոտներին, ովքեր խախտում են ճանապարհային երթևեկության կանոնները, չորեքշաբթի լրագրողներին հայտնեց Հայաստանի ճանապարհային ոստիկանության պետ գնդապետ Մարգար Օհանյանը։

«Հոկտեմբերի մեկից մենք հետիոտների նկատմամբ խիստ միջոցառումներ ենք սկսում»,- ասաց նա՝ հավելելով, որ երթևեկությունը խախտող հետիոտները կտուգանվեն 3000 դրամի չափով (մոտ 8 դոլար) և բերման կենթարկվեն  ոստիկանության բաժիններ։

Ճանապարհային ոստիկանության պետի խոսքերով, այս ակցիան շարունակական կլինի, և դրա նպատակը հետիոտնին ճանապարհային երթևեկության կանոնները պահպանել ստիպելն է։

«Շատ վարորդներ և հետիոտներ չգիտեն ճանապարհային երթևեկության կանոնները։ Հետիոտներն ավելի շատ են խանգարում վարորդներին, քան վարորդները՝ հետիոտներին»,- կարծում է նա։

Ճանապարհային ոստիկանության պետն ավելացրեց, որ, հնարավոր է, սկզբնական փուլում միջոցառումը քաղաքացիների դժգոհությանն արժանան և փորձեն ընդդիմանալ ոստիկանության աշխատակիցների գործողություններին. նրանք այդ դեպքում նույնպես պատասխանատվության կենթարկվեն։

Օհանյանը վստահություն հայտնեց, որ այդ միջոցառումը նույնքան հաջողված կլինի, որքան պայքարը անվտանգության ամրագոտիները չկապող վարորդների դեմ։

Միաժամանակ նա ավելացրեց, որ վարորդների կողմից ամրագոտիները չկապելու համար կազմվել է ավելի քան 14 հազար արձանագրություն։

Օհանյանը հայտնեց նաև, որ 2008 թվականի նույն ժամանակահատվածի համեմատ արձանագրվել է ՃՏՊ-ների և դրանց հետևանքով զոհերի թվի նվազում։

Ըստ նրա, 2009 թվականի առաջին ութ ամիսների ընթացքում արձանագրվել է 1356 ՃՏՊ՝ 2008 թվականի 1510-ի դիմաց, ՃՏՊ-ների հետևանքով ընթացիկ տարում զոհվել է 226 մարդ, իսկ 2008-ին՝ 277, 2009-ին վիրավորվել է 1898 մարդ և 2192 մարդ՝ 2008 թվականին։ -0-