Երևանի կենդանաբանական այգու կենդանիների 60 տոկոսի վանդակների պայմանները չեն համապատասխանում միջազգային նորմերին

ԵՐԵՎԱՆ, 23 սեպտեմբերի. /Նովոստի-Արմենիա/. Երևանի կենդանաբանական այգու կենդանիների 60 տոկոսի վանդակների պայմանները չեն համապատասխանում միջազգային նորմերին, չորեքշաբթի լրագրողներին հայտնեց կենդանաբանական այգու տնօրեն Սահակ Աբովյանը։  

«Կենդանաբանական այգին մոտավորապես 34 հա տարածք է զբաղեցնում, և մեզ մեծ ներդրումներ են անհրաժեշտ այդ տարածքը ամբողջովին շահագործելու և հարմարավետ վանդակներ կառուցելու համար»,- ավելացրեց Աբովյանը։

Նա նշեց, որ կենդանաբանական այգին կառավարության և Երևանի քաղաքապետի սևեռուն ուշադրության ներքո է։ Շուրջ ութ տարի կենդանաբանական այգու ֆինանսավորումը ժամանակին է իրականացվում, և կենդանիները լիովին ապահովված են կերով։

Կենդանաբանական այգու տնօրենի խոսքերով, այգու վերակառուցման ծրագրի շրջանակներում 2008 թվականին կառավարությունը տրամադրել է 57 մլն դրամ, իսկ այս տարի 2 մլն չափով նախատեսված միջոցները սառեցվել են։

«Կարծում եմ, որ հաջորդ տարվա սկզբից կենդանաբանական այգու վերակառուցման աշխատանքները կշարունակվեն»,- նշեց Աբովյանը։

Ըստ նրա, վերակառուցումն անհրաժեշտ է այգուն, քանի որ ըստ միջազգային կազմակերպությունների պահանջների, յուրաքանչյուր կենդանի պետք է ունենա իր վանդակը։

Երևանի պետական կենդանաբանական այգին հիմնվել է 1941 թվականին, այնտեղ բնակվում են շուրջ 2 300 տեսակի կենդանիներ և թռչուններ։ -0-